2014-03-14 01:43

 "სპეცოპერაციის შესახებ ვიდეომასალა კუდის ოპერატორის მიერ არის გადაღებული. გამოძიებას განვუცხადე, რომ შემიძლია ამოვიცნო, თუ ვინ გადაიღო. დამონტაჟებულია თუ არა მასალა, მე ამასთან არავითარი კავშირი არ მაქვს,“- აცხადებს შსს-ს პრესსამსახურის ყოფილი ხელმძღვანელი გურამ დონაძე, რომელიც დღეს ამ საქმეზე მოწმის სტატუსით დაკითხეს.

დონაძე ამბობს, რომ მან არ იცის გაყალბებულია თუ არა მასალა და ამასთან არავითარი კავშირი არ აქვს. როგორც შს სამინისტროს საზოგადოებასთან ურთიერთობის სამსახურის ყოფილმა ხელმძღვანელმა განაცხადა, ნავთლუღის სპეცოპერაციასთან დაკავშირებით დღეს ის მხოლოდ მოწმის სტატუსით დაიკითხა.

მისთვის მთავარი პროკურატურის ბრიფინგისა და გავრცელებული განცხადების შინაარსი მხოლოდ მას შემდეგ გახდა ცნობილი, როდესაც სახლში მივიდა და ამ განცხადების შინაარსით დაინტერესდა: "მინდა ხაზგასმით აღვნიშნო, რომ მე აღნიშნული მასალა არ გადამიღია, არ ვიმყოფებოდი სპეცოპერაციის დროს შემთხვევის ადგილზე, არაფერი დამიმონტაჟებია და დონაძის პრესსამსახურს ამ მასალასთან წვდომა არ ჰქონია. ეს გამოძიებამ იცის და მე მას ამის შესახებ ვესაუბრე", - დასძინა გურამ დონაძემ.

მისივე განცხადებით, პროკურატურას მასთან დაკავშირებით ჰქონდა კითხვები იმის შესახებ, თუ რა დავალება მიიღო და როდის მივიდა შემთხვევის ადგილზე. დონაძემ განმარტა, რომ მას შეტყობინება ოპერატორსიგან ტელეფონზე მიუვიდა, ხოლო როდესაც ის ადგილზე მივიდა, სამი იარაღიანი პირი გარდაცვლილი ესვენა.

დონაძის თქმით, ადგილზე დახვდა დათა ახალაია, რომელმაც სთხოვა, რომ არ ეჩქარა მასალის გავრცელება და ეს გაეკეთებინა მეორე დღისთვის. მისივე განცხადებით, იგი დაემორჩილა მისი უფროსის, დათა ახალაიას მითითებებს და სპეცოპერაციის შესახებ ვიდეომასალა მეორე დღეს გაავრცელა.