2014-03-13 17:24

პოლონეთში ორი ბელორუსი აგენტი დააკავეს, რომლებიც რუსეთისთვის მუშაობდნენ. ამის შესახებ ინფორმაციას პოლონური მედია ავრცელებს.

„პოლონეთის უსაფრთხოების სამსახურმა ორი პირი დააკავა, რომლებიც აგენტობაში არიან ეჭვმიტანილნი. წინასწარი ინფორმაციით, ისინი ბელორუსის მოქალაქეები არიან და რუსეთის ფედერაციის სასარგებლოდ მუშაობდნენ“, - წერენ პოლონური გამომცემლობები.

სამართალდამცავი ორგანოები ამ საქმესთან დაკავშირებით ჯერჯერობით ინფორმაციას არ ავრცელებენ. თუმცა, ცნობილია, რომ აგენტების დაკავების ოპერაცია ერთი კვირის წინ განხორციელდა.

უკანასკნელი წლების მანძილზე პოლონეთის კონტრდაზვერვამ რამდენიმე აგენტი დააკავა, თითოეული მათგანი ეროვნებით რუსი ან ბელორუსი იყო. 2010 წელს პოლონეთში ГРУ-ს აგენტი დააკავეს, რომელსაც პატიმრობის სახით სამი წელი შეეფარდა. 2010 წლის განმავლობაში პოლონეთში სულ მსგავსი ოთხი, 2011 წელს კი ორი ოპერაცია ჩატარდა.