„ევროკავშირი მზადაა უკრაინასთან ასოცირების შესახებ შეთანხმება მომავალ კვირაში გააფორმოს“, - ეს განცხადება გერმანიის კანცლერმა ვარშავაში პოლონეთის პრემიერთან შეხვედრის შემდეგ გააკეთა.
ანგელა მერკელის თქმით, ორშაბათს დაგეგმილ შეხვედრაზე, ორგანიზაციის ქვეყნების საგარეო საქმეთა მინისტრები რუსეთის წინააღმდეგ სანქციების ახალ პაკეტსაც განიხილავენ. იმ შემთხვევაში, თუ მოსკოვი ყირიმთან დაკავშირებით პოზიციას არ შეიცვლის, დოკუმენტი პასუხისმგებელი პირების წინააღმდეგ ეკონომიკური და სავიზო შეზღუდვების დაწესებას ითვალისწინებს.
აღსანიშნავია, რომ ვლადიმერ პუტინს საფრანგეთის პრეზიდენტი ფრანსუა ოლანდი ტელეფონითაც ესაუბრა და ყირიმის ანექსიის შეწყვეტისაკენ მოუწოდა.
„გასულ კვირას ჩვენ ვთქვით, რომ თუ პროგრესს ვერ დავინახავდით, სანქციების მეორე ეტაპზე გადავიდოდით, მას შემდეგ 6 დღე გავიდა და შედეგს ვერ ვხედავთ, მიუხედავად იმისა, რომ ჩვენი საკონტაქტო ჯგუფები მუშაობას განაგრძობენ, ეს კი ნიშნავს იმას, რომ მიმდინარეობს მზადება მეორე ეტაპისთვის. ჩვენ ასევე შევთანხმდით, რომ ასოცირების შეთანხმების პოლიტიკურ ელემენტებს ხელი მალე უნდა მოეწეროს. ჩვენ გვსურს, რომ ეს შემდეგ სამიტზე მოხდეს“, - განაცხადა ანგელა მერკელმა.
უკრაინაში განვითარებულ მოვლენებს ჯორჯ სოროსიც გამოეხმაურა: „ვფიქრობ უკრაინაში განვითარებული მოვლენები ევროპისთვის გამოსაფხიზლებელი უნდა იყოს, უკრაინელებმა დაამტკიცეს, რომ მზად არიან ევროპასთან დასაახლოებლად სიცოცხლეც კი გაწირონ. იმედი მაქვს, ამ გამოწვევას ევროპა სათანადოდ უპასუხებს. ეს მაინცდამაინც რუსეთის წინააღმდეგ სანქციების დაწესებაში კი არ მდგომარეობს, არამედ უკრაინის რეალურ დახმარებაში“, - აღნიშნა სოროსმა.
