„ევროპული საქართველოს“ ლიდერის დავით ბაქრაძის განცხადებით, მთავრობის მიერ წარმოდგენილი გეგმა არასრულყოფილია, რადგან ის დახმარების გარეშე ტოვებს 600 ათას თვითდასაქმებულს და საარსებო მინიმუმზე ნაკლებით ეხმარება ადამიანებს, რომლებმაც ხელფასი დაკარგეს.
„მთავრობის მიერ წარმოდგენილ გეგმას აქვს ორი ძალიან დიდი ხარვეზი. პირველი ეს არის მისი არასრულყოფილება. მაგალითად, გეგმა ყოველგვარი დახმარების გარეშე ტოვებს მინიმუმ 600 ათას თვითდასაქმებულს საქართველოში, ამასთანავე, გეგმა საარსებო მინიმუმზე ნაკლებით ეხმარება იმ ადამიანებს, რომლებსაც სამსახური ჰქონდათ და ხელფასი დაკარგეს, ანუ ეს არის არასრულყოფილი დახმარების გეგმა, რომელიც ვერ აამუშავებს ეკონომიკას იმიტომ, რომ არ ითვალისწინებს გადასახადების შემცირებას,“- განაცხადა დავით ბაქრაძემ.
მისივე განმარებით, გეგმის მეორე ხარვეზი ის არის, რომ მისი შესრულება ძალიან ნელა ხორციელდება. ბაქრაძის განცხადებით, ასეთი არასრულყოფილი გეგმით და მისი შესრულებით ნელი ტემპით საქართველო უმძიმეს ეკონომიკურ მდგომარეობაში აღმოჩნდება.
„თვენახევარი გავიდა საგანგებო მდგომარეობის პირობებიდან, ორი კვირა გავიდა მთავრობის მიერ ამ გეგმის წარდგენიდან და ვხედავთ, რომ დღემდე არც ერთი კონკრეტული ნაბიჯი არ არის გადადგმული, არც ერთ კონკრეტულ ადამიანს არ მიუღია დახმარება და ახლა მიდის მსჯელობა, რას დაამტკიცებენ და როგორ სამომავლოდ. უნდა გვესმოსდეს, რომ ყველა დაკარგული დღის ანაზღაურებას მომავალში შეიძლება, რამდენიმე თვე არ ეყოს, იმხელა ზიანს ვიღებთ ახლა. ამიტომ, ასეთი არასრულყოფილი გეგმით და ამ გეგმის შესრულების ასეთი ტემპით, საქართველო აღმოჩნდება უმძიმეს ეკონომიკურ მდგომარეობაში და ამის მიზეზი იქნება მთავრობის არასრულყოფილი, ნელი და არაკომეტენტური მოქმედება ეკონომიკის მიმართულებით,“- განაცხადა დავით ბაქრაძემ.
