2020-05-03 20:47

მროველ-ურბნელი მიტროპოლიტის, მეუფე იობის (აქიაშვილი) განცხადებით, ყინწვისის მამათა მონასტრის სასულიერო პირებს შორის მომხდარი დაპირისპირების საკითხი სი

ნოდმა არ უნდა განიხილოს, რადგან მან რეაგირება მოახდინა და დაკავებულ მღვდელს ღვთისმსახურების უფლება შეუჩერა.

"სინოდმა რატომ უნდა განიხილოს? ეს არის განსახილველი ადგილობრივ ეპარქიაში. მე ეგ უკვე განვიხილე, მღვდელმოქმედება ავუკრძალე მამა დავითს. აი, ეს არის სასჯელი, მეტი სასჯელი ჩვენ არ შეგვიძლია. მამა საბა კი, ჩვეულებრივად წირავს, ლოცულობს. ახლა სასამართლო გაარკვევს ყველაფერს“, - აცხადებს მეუფე იობი.

მისი თქმით, მონასტრის ტერიტორიაზე მსგავსი ფაქტი არ ყოფილა და სასულიერო პირები ერთმანეთს არ დაპირისპირებიან.

„ნასვამ მდგომარეობაში გასროლა მოხდა, მეტი არაფერი. თქვენ ისიც თქვით, თითქოს მონასტერში მოხდა, მაგრამ მონასტერში ასეთი რამ არ მომხდარა, არც ეპარქიაში. შელაპარაკება იყო, მაგრამ მათ შორის არა. ერისკაცებს შორის ჩხუბი მოხდა. ნასვამ მდგომარეობაში ადამიანს განსჯის უნარი არ აქვს. სასულიერო პირები ერთმანეთს არ დაპირისპირებიან. მამა საბამაც გააკეთა განცხადება ამასთან დაკავშირებით და ალბათ, მამა დავითიც იტყვის. იარაღს არ ატარებდა. ამაზე სასამართლო დადგენილება უნდა იყოს, ხომ იცით?“, - განაცხადა მეუფემ.

მან აღნიშნა, რომ „მამა დავითს ყველაზე მკაცრად ექცეოდა და მას მღვდელმოქმედების ყველაზე მეტი აკრძალვა აქვს“.

კითხვაზე, შესაძლოა თუ არა, რომ მომხდარი ფაქტის შემდეგ, საპატრიარქომ მას უფლებამოსილება შეუჩეროს, მეუფე იობმა განაცხადა: „რისთვის, მე რა დავაშავე?! არავის ვმფარველობ. ნასვამმა მდგომარეობამ არ იცის არც ერისკაცი და არც სასულიერო პირი, დამეთანხმებით? როცა ადამიანი სვამს, არ აქვს მნიშვნელობა, სასულიერო პირია, თუ ერისკაცი. ყოველთვის ცდილობდა, რომ დალევისგან თავი შეეკავებინა“.

მან აღნიშნა, რომ სასულიერო პირებს კონფლიქტი ჰქონდათ და მისი თანდასწრებით შერიგდნენ.

„სიმართლეს გეტყვით, რომ პირიქით იყო, იმ დღეს მამა საბა შერიგებისთვის იყო ჩამოსული, რაღაც კონფლიქტი ჰქონდათ და ჩემი თანდასწრებით შერიგდნენ“,-განმარტა მეუფემ.

მან აღნიშნა, რომ კონფლიქტი ნასვამ მდგომარეობას უკავშირდებოდა.

„გააკეთეთ ჟურნალისტური გამოძიება და ყველაფერს სხვაგვარად დაინახავთ. შეშინების მიზნით ჰაერში მოხდა გასროლა“, - განაცხადა მან.

შეგახსენებთ, რომ ყინწვისის მამათა მონასტრის სასულიერო პირებს შორის ცეცხლსასროლი იარაღით გარჩევის ფაქტზე, სასულიერო პირი დააკავეს. დაკავებულს განზრახ მკვლელობის მცდელობა და ცეცხლსასროლი იარაღის უკანონო შეძენა-შენახვა-ტარება ედება ბრალად. მამა დავითს აღკვეთის ღონისძიების სახით პატიმრობა აქვს შეფარდებული.