2014-03-09 15:08

აშშ-ის პრეზიდენტი ბარაკ ობამა საფრანგეთის პრეზიდენტს ტელეფონით ესაუბრა. ობამამ და ოლანდმა უკრაინის გარეშემო შექმნილი ვითარება განიხილეს.

AFP-ს ცნობთ, ფრანსუა ოლანდმა ამერიკელ კოლეგას განუცხადა, რომ თუ რუსეთი კრიზისის დეესკალაციას არ მოახდენს, მის წინააღდეგ „ახალი ზომები" იქნება მიღებული.

მანამდე საფრანგეთის საგარეო საქმეთა მინისტრმა ლორან ფაბიუსმა განაცხადა, რომ, თუ რუსეთის წინააღმდეგ მიღებული ზომების პირველი რაუნდი შედეგს ვერ გამოიღებს, მას შემდეგი ეტაპი მოჰყვება. სანქციები, მისი თქმით, შესაძლოა რუსულ კერძო კომპანიებს და ვლადიმირ პუტინთან დაახლოებულ პირებს შეეხოს.

შეგახსენებთ, აშშ-მა და კანადამ განაცხადეს, რომ უკრაინის ტერიტორიული მთლიანობის ხელყოფაზე პასუხისმგებელ პირთა წინააღმდეგ პერსონალური სავიზო და ფინანსური სანქციები შემოიღეს. ევროკავშირის ლიდერებმა კი რუსეთთან ვიზის ლიბერალიზაციაზე და სავაჭრო შეთანხმებაზე მოლაპარაკეები შეაჩერეს.

შეგახსენებთ, რომ უკრაინაში რუსეთის ქმედებების გამო, ვაშინგტონმა რუსეთს დიპლომატიური ულტიმატუმი წაუყენა. ჯონ კერიმ სერგეი ლავროვს დაურეკა და კატეგორიულად გააფრთხილა, სამხედრო ესკალაციის გაგრძელება ყირიმსა და უკრაინის სხვა რეგიონებში კრიზისის დიპლომატიური გზით მოგვარების შანსს აღარ ტოვებს. მოსკოვის მხრიდან ყირიმის ანექსიის ნებისმიერი მცდელობა სამუდამოდ დახურავს დიპლომატიის სივრცეს, - აღნიშნა ჯონ კერიმ.