დღეს, კონსტანტინეპოლში მიმდინარე დიდი ასამბლეის საბჭომ, რომლის შემადგენლობაში შედიან ყველა ადგილობრივი ავტოკეფალური ეკლესიის მეთაურები და წარმომადგენელი მღვდელმთავრები, დაადგინა დიდი საყოველთაო მართლმადიდებლური კრების ჩატარების თარიღი.
დიდი საყოველთაო მართლმადიდებლური კრება ჩატარდება 2016 წელს, კონსტანტინეპოლში (სტამბული, თურქეთი). თითოეული ეკლესიიდან იქნება ოც კაციანი წარმომადგენლობა(პრელატი).
თითოეულს ექნება ერთი ხმა და ყველა გადაწყვეტილება მიიღება კონსენსუსის პრინციპითა და ერთხმად. ამ საკითხის განხილვისას რუსეთის ეკლესიის პოზიციას კონსენსუსის აუცილებლობაზე საქართველოს ეკლესიამ დაუჭირა მხარი. კონსტანტინეპოლის და სხვა ეკლესიები ითხოვდნენ, გადამწყვეტი ხმათა უმრავლესობა ყოფილიყო.
შეიქმნა სპეციალური კომისია, რომელიც მოამზადებს დიდი და წმიდა კრების ჩატარების პროგრამასა და დეტალებს.
ამ საკითხთან დაკავშირებით, სრულიად საქართველოს კათოლიკოს-პატრიარქმა აღნიშნა, რომ მსოფლიო კრებები იმართებოდა ერესებისაგან დაცვისა და ჭეშმარიტი რწმენის გამყარების მიზნით, ხოლო მოსალოდნელი საყოველთაო მართლმადიდებლური კრების მიზანი სხვაა - აჩვენოს თანამედროვე მსოფლიოს მართლმადიდებელ ერთა ერთიანობა.
“ამიტომაც ჩვენ ვთვლით, რომ სანამ ეს კრება მოიწვევა, აუცილებლია ყველა დღის წესრიგში შეტანილი საკითხი განხილულ იქნას და კონსესუსის მიხედვით შეთანხმდეს, გათვალისწინებულ იქნას ყველა ეკლესიის ინტერესები, ასევე მომავალი დიდი კრების ჩატარების ფორმატიც შეთანხმდეს კონსენსუსით;
ამას გარდა, აუცილებელია კიდევ ერთხელ გადაიხედოს ის საკითხები, რომლებზეც ჩვენ უკვე ვიმუშავეთ, რათა თანამედროვე მდგომარეობიდან გამომდინარე, გავამყაროთ ჩვენი პოზიციები” – აღნიშნა სრულიად საქართველოს კათოლიკოს-პატრიარქმა, უწმიდესმა და უნეტარესმა ილია მეორემ.
