2014-03-07 14:47

საქართველოს თავდაცვის მინისტრი ირაკლი ალასანია რუსეთის ფედერაციის სამხედრო ვერტმფრენის მიერ საქართველოს საჰაერო სივრცის დარღვევის ფაქტს ეხმაურება.

მინისტრის განცხადებით, საქართველო მუდმივ საბრძოლო მზადყოფნაშია, საჰაერო სივრცის მორიგ დარღვევას კი დამატებითი პრობლემები არ შეუქმნია:

"2008 წლის შემდეგ დაახლოებით ათასამდე საჰაერო სივრცის დარღვევის ფაქტს ჰქონდა ადგილი. საქართველოს შეიარაღებული ძალები აკონტროლებენ ვითარებას და ყველა მოქმედებისთვის მზადყოფნის შესაბამისი სცენარია გამოცხადებული. მინდა გითხრათ, რომ არანაირი საფრთხე ამ გადაფრენას ჩვენი უსაფრთხოებისთვის იმ მოცემულ მომენტში დამატებით არ შეუქმნია. ჩვენ ვართ მუდმივ საბრძოლო მზადყოფნაში, იმიტომ რომ ჩვენი ტერიტორიის 20% ოკუპირებულია. აქედან გამომდინარე, ჩვენს გეგმებში ამით არაფერი არ შეცვლილა", - განაცხადა ირაკლი ალასანიამ.