1 მარტს რუსეთ–უკრაინის ურთიერთობის გამწვავებაზე, როცა ფედერაციის საბჭომ ვლ. პუტინს უკრაინაში რუსეთის შეიარაღებული ძალების გამოყენების მანდატი მისცა, საერთაშორისო საფონდო ბაზარმა ორშაბათს, 3 მარტს მოახდინა რეაგირება.
როგორც Forbes წერს, ძალის გამოყენების შესაძლებლობამ და დასავლეთის მხრიდან რუსეთის წინააღმდეგ სანქციების გამოყენების რეალურობამ ინვესტორებში ნამდვილი შოკი გამოიწვია.
რუსეთის საფონდო ბაზრის კაპიტალიზაცია მხოლოდ ერთი დღის განმავლობაში 2 ტრილიონი რუბლით „დაჯდა“, ხოლო РТС–ისა (ფინანსური ბაზრის განვითარების არაკომერციული პარტნიორული ორგანიზაცია) და ММВБ–ს (მოსკოვის ბანკთაშორისი სავალუტო ბირჟა) ინდექსებმა 10%–ზე მეტით დაიწია.
Forbes დაინტერესდა, რა გავლენა მოახდინა „შავმა ორშაბათმა“ მსხვილ ბიზნესზე და გაანალიზა, რა ქონება დაკარგა ამ ერთი დღის განმავლობაში მსოფლიო მილიარდერთა სიაში მყოფმა ოცმა ყველაზე მდიდარმა რუსმა მსხვილმა ბიზნესმენმა.
შეფასებისთვის გამოიყენებოდა ბიზნესმენების კუთვნილი იმ კომპანიების აქციების მსხვილი პაკეტები, რომლებიც რუსულ და მსოფლიო საფონდო არენაზე ვაჭრობენ, მაგრამ აქტივები რუსეთის ტერიტორიაზე აქვთ.
აქციათა ამ პაკეტების საბაზრო ფასი პარასკევს, 28 თებერვალს, ვაჭრობის დახურვის შემდეგ 101, 8 მილიარდ დოლარს შეადგენდა, ხოლო „შავმა ორშაბათმა“ ამ ფასიდან 9,5 მილიარდი დოლარი „მოკბიჩა“ და ფასი 92,3 მილიარდ დოლარამდე ჩამოიყვანა.
Forbes–მა კონკრეტული მილიარდერების ზარალიც დათვალა. ასე მაგალითად, ლეონიდ მიხელსონმა, რომელიც მილიარდერთა მსოფლიო რეიტინგში 57–ე ადგილზეა, 1, 34 მილიარდი დოლარით იზარალა – სწორედ ამდენით შემცირდა მის მფლობელობაში არსებული აქციათა პაკეტის ფასი.
სერგეი გალიცკის დანაკარგი 1,29 მილიარდი დოლარია, გენადი ტიმჩენკოს – 1,27 მილიარდი, ვლადიმირ ევტუშენკოვის – 88 მილიონი.
