2014-03-06 14:13

6 მარტის 12:00 საათიდან ლაგოდეხში სასწრაფო დახმარების მედპერსონალმა გაფიცვა გამოაცხადა. გაფიცვა ორი საათის განმავლობაში გაგრძელდა.

ამის შესახებ ექსკლუზიურად რადიო „აფხაზეთის ხმას“ ლაგოდეხიდან აცნობეს. მედპერსონალი აცხადებს, რომ ორი თვეა, ხელფასი არ აუღია.

ისინი გაფიცვის შეწყვეტაზე უარს ამბობდნენ მანამ, სანამ დაფინანსებასთან დაკავშირებული პრობლემები არ მოგვარდებოდა, თუმცა მოგვიანებით სასწრაფო დახმარების ადგილობრივი წარმომადგენლობა თბილისს დაუკავშირდა და გაფიცვის შესახებ აცნობა, რის შემდეგაც მათ პირობა დადეს, რომ დაფინანსების პრობლემები რამდენიმე დღეში მოგვარდება.

ამ სატელეფონო საუბრის შინაარსის გაცნობის შემდეგ მედპერსონალმა გაფიცვა შეწყვიტა და განაცხადა, რომ თუ მომავალ კვირაში პრობლემა არ მოგვარდება, გაფიცვას განაახლებენ. ამ დროისთვის გაფიცვა შეწყვეტილია.