2014-03-04 16:16

თუ განუკითხაობა იქნება აღმოსავლეთ რეგიონში და ხალხი მიმართავს რუსეთს დახმარების თხოვნით, მოსკოვი იტოვებს უფლებას, ყველა საშუალება გამოიყენოს მოქალაქეების დასაცავად და ამას სრულიად ლეგიტიმურად მიიჩნევს, - განაცხადა რუსეთის პრეზიდენტმა ვლადიმერ პუტინმა დღევანდელ პრესკონფერენციაზე.

"რაც შეეხება სამხედრო ძალების შეყვანას და მათ გამოყენებას, ჯერ ამის აუცილებლობა არ არის, თუმცა შესაძლებლობა არსებობს.

მინდა გითხრათ, რომ ჩვენი წვრთნები, რომელიც ცოტა ხნის წინ ჩატარდა, არანაირად არ არის დაკავშირებული უკრაინის მოვლენებთან. ეს ღონისძიება ბევრად ადრე იყო დაგეგმილი, მართალია, არ გამოცხადებულა არსად. გუშინ გავეცი ბრძანება ყველა სამხედრო შენაერთის მუდმივი დისლოკაციის ადგილზე დაბრუნების შესახებ. რა შეიძლება გახდეს სამხედრო ძალის გამოყენების მიზეზი? – ეს რა თქმა უნდა, უკიდურესი შემთხვევაში შეიძლება მოხდეს", - განაცხადა პუტინმა.

 მისივე თქმით, რუსეთი სამხედრო ძალას უკრაინაში უკიდურეს შემთხვევაში გამოიყენებს, რუსეთს აქვს უკრაინის ლეგიტიმური პრეზიდენტის ვიქტორ იანუკოვიჩის თხოვნა, სამხედრო ძალის გამოყენების შესახებ უკრაინის მოსახლეობის დასაცავად.

"რა თქმა უნდა, ის რასაც ახლა ვიტყვი, ჩემს კომპეტენციაში არ შედის და არ ვაპირებთ ჩარევას, მაგრამ მინდა კიდევ ერთხელ გავუსვა ხაზი, რომ ჩვენ მიგვაჩნია – უკრაინის ყველა მოქალაქეს, სადაც არ უნდა ცხოვრობდნენ ისინი, ერთნაირი უფლებები უნდა ჰქონდეთ ქვეყნის ცხოვრებისა და მომავლის გადაწყვეტაში. მათ ადგილზე, ვინც თავს უკრაინის ლეგიტიმურ ხელისუფლებად მიიჩნევს, დავაჩქარებდი შესაბამის პროცედურებს, რადგან მათ არ გააჩნიათ საერთო ნაციონალური მანდატი შიდა და გარე ეკონომიკური პოლიტიკის გატარებაზე, მითუმეტეს, ქვეყნის მომავალის გადაწყვეტაზე", - განაცხადა რუსეთის პრეზიდენტმა.

 რუსეთის პრეზიდენტის ვლადიმერ პუტინის განცხადებით, უკრაინის ერთდაერთი ლეგიტიმური პრეზიდენტი სწორედ ვიქტორ იანუკოვიჩია, რადგან უკრაინის კანონმდებლობის მიხედვით, პრეზიდენტის ხელისუფლებიდან ჩამოშორების სამი მეთოდი არსებობს - გარდაცვალება, მისი პირადი განცხადება და იმპიჩმენტი. იმპიჩმენტი გრძელვადიანი პროცედურაა, რომელიც არ გატარებულა.

აქედან გამომდინარე, პუტინის თქმით, უკრაინაში მიმდინარე მოვლენებს მხოლოდ ერთი შეფასება შეიძლება მიეცეს – ხელისუფლების შეიარაღებული დამხობა.

"ამაზე არავინ დავობს, მაგრამ რატომ გაკეთდა ეს? 21 თებერვალს იანუკოვიჩმა, საგარეო საქმეთა მინისტრების შუამდგომლობით, ხელი მოაწერა შეთანხმებას, რომლის მიხედვითაც, დაეთანხმა ოპოზიციის ყველა მოთხოვნას – პარლამენტისა და პრეზიდენტის ვადამდელ არჩევნებს, 2004 წლის კონსტიტუციის დაბრუნებას. ის დათანხმდა, არ გამოეყენებინა ძალა, მაგრამ როგორც კი იანუკოვიჩი ხარკოვში გაემართა, მისი რეზიდენცია დაიკავეს. მას არანაირი შანსი არ ჰქონდა ხელახლად არჩევის. ამაზე ყველა თანხმდება, ყველა ჩემი კოლეგა. რა საჭირო იყო ქვეყანაში იმ ქაოსის შექმნა, რომელშიც ის ახლაა? – ამ კითხვაზე პასუხი არ არსებობს. საკუთარი ძალის ჩვენება უნდოდათ – ჩემი აზრით, ეს სულელური ქმედებაა. ამ ქმედებებით მათ უკრაინის სამხრეთი და სამხრეთ-აღმოსავლეთი შეარყიეს", - განაცხადა პუტინმა.