-
2019-11-18 15:28
ნიკა მელიას განცხადებით დეპუტატებს პარლამენტში არ შეუშვებენ, რადგან ისინი არ ემსახურებიან საზოგადოების ინტერესებს.
„ეს არის ორგანო, სადაც უნდოდათ რამდენიმე დღეში კოლექტიური მურუსიძეების უვადოდ დანიშვნა, საკუთარი ადვოკატის უზენაესი სასამართლოს თავმჯდომარედ დანიშვნა და ა.შ. ეს ფუნქცია აქვს მას მეტი არაფერი. შიგნით ჰყავს შეყვანილი ადამიანები, რომლებსაც ფულს აშოვნინებს სხვადასხვა ბიზნესით და შესაბამისად, ისინი ბარტერს უკეთებენ ამ ადამიანს და მხარს უჭერენ ყველა იმ გადაწყვეტილებას ან არ უჭერენ, რომელსაც ბიძინა ივანიშვილი ეტყვის.“ - ამბობს ნიკა მელია
მისი თქმით ყველაფერს საზღვარი აქვს, რომელსაც ბიძინა ივანიშვილი დიდი ხანია გადასცდა და დღევანდელი რეალობა სწორედ ის არის, რომ ქვეყანაში ღრმა პოლიტიკური კრიზისია.
კახა კალაძის იმ განცხადებას, რომ საარჩევნო სისტემასთან დაკავშირებით რაიმე ახალი ინიციატივის განხილვას მმართველი გუნდი აღარ აპირებს, ნიკა მელია არასერიოზულად მიიჩნევს და უტიფრად მოიხსენიებს.
„ჩვენ ჩვენი გეგმა და მოთხოვნები გვაქვს. ჩვენ პულსზე დავადეთ საზოგადოებას ხელი და აქ ვიწრო პარტიული ინტერესით არავინ არის. „ქართული ოცნების“ მხარდამჭერების ნაწილიც კი გაოგნებულია და კალაძის ასეთი უტიფარი განცხადებები ემსახურება მათი მხარდამჭერების რამენაირად უკან შემობრუნებას.“ - განაცხადა მელიამ