ამერიკის შეერთებული შტატების სახელმწიფო დეპარტამენტმა ადამიანის უფლებათა დაცვის შესახებ 2013 წლის ანგარიში გამოაქვეყნა.
ანგარიშში საქართველოს ყოფილი პრემიერმინისტრის ვანო მერაბიშვილის დაკავების შესახებაც არის საუბარი. ანგარიშში ნათქვამია, რომ გასული წლის ივნისში საქართველოს შინაგან საქმეთა ყოფილი მინისტრი სამსახურეობრივი უფლებამოსილების გადამეტების ბრალდებით დააკავეს.
ანგარიშში აღნიშნულია, რომ მერაბიშვილის დაკავება სანდრო გირგვლიანის საქმის გამოძიების ხელის შეშლას უკავშირდება. ამასთან, აშშ-ის სახელმწიფო დეპარტამენტის მიერ გამოქვეყნებულ ანგარიშში აღნიშნულია, რომ ვანო მერაბიშვილს ასევე ბრალი შეეფარდა 2011 წელს ანტისამთავრობო პროტესტის დროს ძალის გადამეტებული მიზანმიმართული გამოყენების ბრძანებისთვის.
აღნიშნულია, რომ საქართველოს სასჯელაღსრულების, პრობაციისა და იურიდიული დახმარების სამინისტრომ და გენერალურმა პროკურატურამ უარყვეს ბრალდება ვანო მერაბიშვილის განცხადებაზე, რომ დეკემბერში ის საკნიდან გაურკვეველი მიმართულებით წაიყვანეს.
გენერალური პროკურორი ოთარ ფარცხალაძე კი დაემუქრა მას, რომ ზიანს მიაყენებდა მის ოჯახს და პირადად მას ციხეში პირობებს გაუუარესებდა, თუ მერაბიშვილი არ მისცემდა ჩვენებას ყოფილი პრეზიდენტის მიხეილ სააკაშვილის წინააღმდეგ და არ დაეხმარებოდა გამოძიებას ყოფილი პრემიერის ზურაბ ჟვანიას სიკვდილის გამოძიებაში.
