საქართველოს საგარეო საქმეთა მინისტრი მაია ფანჯიკიძე აცხადებს, რომ აშშ–ის პრეზიდენტთან ბარაკ ობამასთან შეხვედრაზე რუსეთის მხრიდან ოლიმპიადის დახურვის მეორე დღესვე დაწყებულ პროვოკაციებზეც ისაუბრეს.
ამასთან, საგარეო უწყების ხელმძღვანელი შიშობს, რომ ის 11 კილომეტრიანი უსაფრთხოების ზონა, რომელიც სოჭის ოლიმპიადის კონტექსტში შეიქმნა, შესაძლოა, არც მოიშალოს. მაია ფანჯიკიძე აცხადებს, რომ რუსეთი ბევრ პროვოკაციას გვიმზადებს ასოცირების ხელშეკრულების ხელმოწერამდე:
„პრეზიდენტმა ობამამ ხაზი გაუსვა, რომ მნიშვნელოვანია საქართველოს მიერ გადადგმული კონსტრუქციული ნაბიჯები რუსეთთან მიმართებაში, რადგან ეს იოლს ხდის საქართველოს თემაზე საუბარს სხვადასხვა ფორმატში და სხვადასხვა კონტექსტში.
დღევანდელი ამბები, რა საკვირველია, მოვუყევით ამერიკულ მხარეს, კერძოდ, ეს არის მავთულხლართების დამონტაჟების განახლება ოლიმპიადის დასრულებიდან მეორე დღესვე და ისიც აღვნიშნეთ, რომ ჩვენ ამას გარკვეულწილად ველოდით, რადგან ის 11–კილომეტრიანი უსაფრთხოების ზონა, რომელიც ვითომდა შეიქმნა სოჭის ოლიმპიადის კონტექსტში, სავარაუდოდ, შეიძლება, აღარ მოიშალოს და დარჩეს ისე, როგორც არის დღეს, რადგან დღევანდელმა მოვლენებმა კიდევ უფრო გაგვიღრმავა ის ეჭვი, რომ რუსეთი ბევრ პროვოკაციას გვიმზადებს ასოცირების ხელშეკრულების ხელმოწერამდე.
ამერიკის შეერთებული შტატების ხელმძღვანელობა სრულად უჭერს მხარს საართველოს ტერიტორიულ მთლიანობას და სვერენიტეტს. ეს, რა საკვირველია, ხაზგასმით ითქვა ამ შეხვედრაზე“, – აღნიშნა მაია ფანჯიკიძემ.
