რუსეთს საერთაშორისო ნორმების დარღვევის გარეშე, სამართლებრივ საფუძველზე შეუძლია ჯარი გაგზავნოს უკრაინაში, ამისთვის საკმარისია, იანუკოვიჩმა მოგვმართოს თხოვნით, – აცხადებს რუსეთის ლიბერალ–დემოკრატიული პარტიის ლიდერი ვლადიმირ ჟირინოვსკი.
ჟირინოვსკიმ ეს განცხადება დღეს დუმაში ჩატარებულ პრესკონფერენციაზე გააკეთა:
„იანუკოვიჩის ადგილას მე მოველაპარაკებოდი უკრაინის სამხრეთ–აღმოსავლეთ რეგიონების ხელმძღვანელებს, რუსეთს ვთხოვდი უსაფრთხოების დაცვას და გამოვაცხადებდი, რომ მოქმედი და ლეგიტიმური პრეზიდენტი ვარ. იანუკოვიჩს თავისუფლად შეუძლია, აღდგენილი იყოს უფლებებში.
მართალია, სრულიად უკრაინის პრეზიდენტი ვერ იქნება, მაგრამ ის მაინც შეუძლია, რომ 25 მაისს არჩევნები არ ჩატარდეს. მას თავის გადარჩენა შეუძლია. მას შეუძლია, მიიწვიოს ჩვენი არმია, რადგან უკრაინის არმია დღეს ქმედუუნაროა“, – ამბობს ჟირინოვსკი.
ჟირინოვსკიმ ხაზი გაუსვა, რომ რადის სპიკერი და პრეზიდენტის მოვალეობის შემსრულებლად დანიშნული ტურჩინოვი თვითმარქვიაა, იანუკოვიჩი კი ერთადერთი, კანონიერი და მოქმედი პრეზიდენტია:
„თუ ჩვენ ჩვენს შეიარაღებულ ძალებს იანუკოვიჩის თხოვნით გავგზავნით იქ, ეს იქნება წმინდა სამართლებრივი ქმედება საერთაშორისო ნორმების მიხედვითაც. ჩვენ გვაქვს უფლება, იქ გავგზავნოთ ჯარი, ჩვენი საზღვაო ფლოტის დაცვის მიზნით.
იანუკოვიჩი კანონიერი პრეზიდენტია და აქვს უფლება, რუსეთთან გააფორმოს შეთანხმება სამხედრო მხარდაჭერის შესახებ“, – თქვა ჟირინოვსკიმ. მისივე თქმით, პარტია მზადაა, საჭიროების შემთხვევაში უკრაინის სამხრეთ–აღმოსავლეთ ნაწილში მოხალისეთა რაზმები გაგზავნოს.
