2018-05-29 14:08

ცეცხლსასროლი იარაღის უკანონო შეძენის, შენახვისა და ტარებისთვის სასჯელი მკაცრდება. ცვლილება სისხლის სამართლის კოდექსში შედის.

პროექტს იურიდიულ საკითხთა კომიტეტის სხდომაზე შინაგან საქმეთა მინისტრის მოადგილე ნათია მეზვრიშვილი წარადგენს.

ინიციატივის მიხედვით, დანაშაულის შემთხვევაში სასჯელის ვადები იზრდება. შინაგან საქმეთა მინისტრის მოადგილე დღესვე კიდევ ერთ ინიციატივაზე ისაუბრებს, რაც სასჯელის გამკაცრებას ამჯერად დანაშაულის დაფარვაზე გულისხმობს.

„შს სამინისტრომ წარმოადგინა ძალიან კარგი არგუმენტები, შესაბამისად ამ საკითხს ჩვენ მხარს ვუჭერთ, ასევე არის არგუმენტები სერიოზული დანაშაულის დაფარვის გამკაცრებასთან დაკავშირებით. მას შემდეგ რაც შევა ეს ცვლილებები და ამ ეტაპისთვის საჭიროა ამ ცვლილებების განხორციელება, რა შედეგს მივიღებთ 6 თვის თავზე, რომ გვითხრას შს სამინისტრომ,“-განაცხადა ლევან გოგიჩაიშვილმა.

ცვლილებებს აკრიტიკებენ ოპოზიციაში. „ევროპული საქართველოს“ წევრები ამბობენ, რომ საკანონმდებლო ინიციატივა ქვეყანაში კრიმინალთან დაკავშირებულ პრობლემებს კიდევ ერთხელ ადასტურებს.

„ვერავინ ვერ იქნება მაინც და მაინც აღფრთოვანებული წარმოდგენილი ცვლილებებით, ვინაიდან ბევრი მათგანი გულისხმობს გარკვეული სანქციების ზრდას, თუმცა ერთი რამ ცხადია, რომ შს სამინისტრო წარმოდგენილი საკანონმდებლო ინიციატივით პირდაპირ ადასტურებს იმას, რომ ქვეყანაში არის სერიოზული პრობლემა კრიმინალთან,“-აცხადებს „ევროპული საქართველოს“ წევრი გიორგი ტუღუში.