2018-05-22 16:36

დაპირისპირება ძიუდოს ფედერაციაში პიკს აღწევს. დღეს სპორტსმენებმა ფედერაციის პრეზიდენტის დავით ქევხიშვილის სკამი კაბინეტიდან გამოიტანეს და სანაგვე ურნაში გადააგდეს, შემდეგ მისი კაბინეტის კარი აჭედეს.

ძიუდოისტების პროტესტი დღეს დილიდან, ფედერაციის შენობასთან განახლდა, სადაც ისინი უცვლელი მოთხოვნით შეიკრიბნენ და დავით ქევხიშვილის გადადგომა მოითხოვეს.

სპორტსმენები ფედერაციაში დავით ქევხიშვილის ერთპიროვნულ მმართველობაზე საუბრობენ. სპორტსმენები ბიუჯეტის არამიზნობრივ ხარჯვაზე ამახვილებენ ყურადღებას.
10 დღის წინ შექმნილ კომისიას, რომელსაც ფედერაციაში არსებული პრობლემები უნდა შეესწავლა, ძიუდოისტები უნდობლობას უცხადებენ და აცხადებენ, რომ შეხვედრას აზრი არ აქვს.

„პროტესტი გრძელდება და უპირობოა ჩვენი მოთხოვნა, უნდა გადადგეს დავით ქევხიშვილი დაკავებული თანამდებობიდან. 20 დღეა, ჩვენ უკვე აღარ ვვარჯიშობთ, ყურადღება ჩვენ მიმართ არის ნაკლები იმ ადამიანების მხრიდან, ვისაც ხელეწიფება ამ პრობლემის მოგვარება, ჩვენ ვაგრძელებთ ჯანსაღ პროტესტს,“- განაცხადა ძიუდოისტთა ნაკრების კაპიტანმა, ვარლამ ლიპარტელიანმა.

წყარო:რუსთავი2