2017-11-27 23:47

თბილისის ბიუჯეტი 60 მილიონი ლარით იზრდება - ამ თანხას დედაქალაქის მერია ცენტრალური ბიუჯეტიდან მიიღებს. ფინანსთა მინისტრსა და კალაძეს შორის შეთანხმება უკვე შედგა.

თბილისის მერის თქმით, ეს თანხა მოხმარდება მის მიერ დაანონსებული პროექტების განხორციელებას, რომელთა შესრულება 2018 წლიდან დაიწყება.

„დაახლოებით 60 მილიონით გაიზრდება ბიუჯეტი 2018 წლის განსახორციელებელი პროექტებისთვის და ეს არის ქალაქისთვის ზოგადად მნიშვნელოვანი. ეს თანხები მიმართული კონკრეტულ პროექტებზე, ეს არის მეტროს სარეაბილიტაციო სამუშაოები, როგორც მეტროსადგურების, ასევე ვაგონების განახლება, ეს არის ძველი თბილისის ისტორიული ნაწილის რეაბილიტაცია და ჩვენ რაც გვქონდა წინასაარჩევნოდ გაჟღერებული, იმ კონკრეტული პროექტების განხორციელება მოხდება“ - განაცხადა კახა კალაძემ.

ბიუჯეტის ზრდასთან დაკავშირებით განმარტება გააკეთა ფინანსთა მინისტრმაც. მამუკა ბახტაძის განცხადებით, ზრდის გადაწყვეტილება მთავრობის მიერ იმ პროექტების შესწავლის შემდეგ იქნა მიღებული, რომლის განხორციელებასაც თბილისის მერია გეგმავს.

„ქალაქის მერიას აქვს ძალიან ბევრი მნიშვნელოვანი პროექტი განსახორციელებლად, 2018 წლისთვის. საქართველოს მთავრობამ, პრემიერ-მინისტრის ხელმძღვანელობით, შეისწავლა აღნიშნული პროექტები და მიღებულია გადაწყვეტილება, რომ 2018 წელს ქალაქ თბილისში განსახორციელებელი პროექტების ბიუჯეტი გაიზარდოს დაახლოებით, 60 მილიონი ლარით“-აცხადებს მამუკა ბახტაძე.