2017-11-16 20:25

ოკუპანტებმა აფხაზეთ-სამეგრელოს ადმინისტრაციულ საზღვართან ზუგდიდის სოფელ ხურჩის მკვიდრი ცოლ-ქმარი ზური და ლულიკო მორგოშიები დააკავეს.

როგორც „ლაივპრესს“ დაკავებულების მეზობელმა უთხრა, 67 წელს მიღწეული ცოლ-ქმარი 15 ნოემბერს, საღამოს საკუთარ თხილნარში დააკავეს, დღეს დილით კი გაათავისუფლეს.

მეზობელი ამბობს, რომ მორგოშიები ე.წ. საზღვრის უკანონო კვეთისთვის დააკავეს. მისივე ცნობით, ცოლ-ქმარი სიტყვიერად გააფრთხილეს და მომავალში თხილნარში შესვლაც აუკრძალეს.

„შეცოდებიათ, ხბო და ძროხა ჰყავდათ იმ ნაკვეთში და ის მოჰყავდათ უკან. მოკლედ, კალოშებით წაუყვანიათ. თანხა არ გადაუხდიათ, შეცოდებიათ და აპატიეს“, - ამბობს მეზობელი.

მისივე ინფორმაციით, მორგოშიების მიწის ნაკვეთი ზუგდიდის სოფელ ხურჩის ტერიტორიაა და მათი საცხოვრებელი სახლიდან 5 მეტრში მდებარეობს.