2017-09-10 20:38

საქართველოს მესამე პრეზიდენტმა ვიდეოზარის მეშვეობით მიმართა შეგინის უკრაინის მხარეს შეკრებილ მხარდამჭერებს. მის მიმართვას ოვაციები მოჰყვა. 

"მე აუცილებლად შემოვალ უკრაინაში, ჩვენ აუცილებლად შევცვლით უკრაინას, აუცილებლად დავსჯით დამნაშავეებს", - განაცხადა მიხეილ სააკაშვილმა მომხრეების გასაგონად, რომელთაგან სულ რაღაც ორასი მეტრი აშორებს. მიხეილ სააკაშვილი ნეიტრალურ ზონაში იმყოფება. 

საქართველოს მესამე პრეზიდენტმა კომენტარი "რუსთავი-2-თანაც" გააკეთა:

"ეს ვინ ყოფილა პოროშენკო, 40 მილიონიანი ქვეყნის პრეზიდენტი ისე იქცევა, თითქოს ბავშვია, რომელმაც მურაბა მოიპარა, ეშინია, რომ დედა თუ მამა გაუწყრება და მაგიდის ქვეშაა დამალული... მას ჰგონია, რომ როგორც კი უკრაინაში ფეხს შევდგამ, დაემხობა", - თქვა მიხეილ სააკაშვილმა და დამატა:

"მე აუცილებლად შევალ უკრაინაში, თუ აქედან არ გამოვა ეს, სხვა ადგილიდან შევალ, თუ საჭირო გახდება, სხვა არაორდინარულ ნაბიჯებსაც გადავდგამ".