ხანგრძლივი ავადმყოფობის შემდეგ ბაჩო და დათა ახალაიების დედა, ქალბატონი ნანი გაბედავა გარდაიცვალა. მას სამშაბათს, თბილისში დაკრძალავენ. ბაჩო ახალაიას ე.წ. მატროსოვის ციხეში დედის გარდაცვალების შესახებ ოჯახის წევრებმა 18 აგვისტოს შეატყობინეს.
"თუ შეიძლება, დამტოვეთ, მარტო მინდა ყოფნა", - ასეთი იყო ბაჩო ახალაიას რეაქცია ხანმოკლე დუმილის შემდეგ. მოგვიანებით ციხის ადმინისტრაციამ მიიღო გადაწყვეტილება, რომ ბაჩო ახალაიასთვის დედის უკანასკნელ გზაზე გაცილების საშუალება მიეცათ: პროცედურის მიხედვით, ის ბადრაგის თანხლებით, ხელბორკილდადებული უნდა მიეყვანათ იმ ადგილას, სადაც დედის ცხედარია დასვენებული. ბაჩო ახალაიამ ამაზე უარი განაცხადა:
"სანამ უკანასკნელი ჯარისკაცი არ დატოვებს ციხეს, მე აქედან არ გავალ. მე ვარ უდანაშაულო, თავისუფლებისთვის მებრძოლი ჯარისკაცი და ციხის ზედამხედველობის შემოთავაზებას, ბორკილებდადებული გამოვემშვიდობო დედას, არ მივიღებ." - ასე უპასუხა მან შემოთავაზებას.
ბაჩო ახალაიას ამ გადაწყვეტილებას სოციალურ ქსელში უამრავი ადამიანი გამოეხმაურა. მათ შორის იყო საქართველოს მესამე პრეზიდენტი მიხეილ სააკაშვილიც, რომელიც გარდაცვლილ ნანი გაბედავას პირადად იცნობდა:
"ბაჩო ახალაიამ მიიღო გადაწყვეტილება, რომ უარი თქვას რეჟიმის შემოთავაზებაზე, სპეცრაზმის ბადრაგის თანხლებით მიიყვანონ დედის გასვენებაში. მას მართლა გამორჩეული დედა ჰყავდა, რომელსაც 20 წელზე მეტი ვიცნობ და დიდ პატივს ვცემდი.
დარწმუნებული ვარ, რომ ვერც ერთი ის ადამიანი, რომელიც თვლის, რომ ბაჩო უნდა იჯდეს, ვერ დაგისახელებთ იმ მუხლს, რომლითაც ის არის გასამართლებული. მას მისჯილი აქვს კანონიერი ქურდების ჩვენების საფუძველზე და განაჩენში წერია, რომ მან "სავარაუდოდ ჩაიდინა დანაშაული". ეს არის ჭორვილური სამართალი, რომელიც სამარცხვინო ლაქად დარჩება საქართველოს ისტორიაში", - დაწერა მიხეილ სააკაშვილმა "ფეისბუქზე".
"აფხაზეთის ხმა" სამძიმარს უცხადებს ახალაიების ოჯახს ქალბატონ ნანი გაბედავას გარდაცვალების გამო.
