2017-07-31 15:31

დღეს დილიდან წინაგარას სამხედრო ბაზიდან რუსი ოკუპანტების კუთვნილი სამხედრო მანქანების გადაადგილება ყარაფილას ზემო მონაკვეთში შეიმჩნეოდა, რაც ავტომაგისტრალზე ამერიკული სამხედრო ტექნიკის გადაადგილებით იყო გამოწვეული.

ამის შესახებ ორგანიზაცია „ძალა ერთობაშია" იტყობინება, რომლის წევრებიც ყარაფილა-ბერშუეთის საოკუპაციო ზოლზე მშვიდობიან სამოქალაქო სადამკვირვებლო მისიას ასრულებენ. როგორც ორგანიზაციის საინფორმაციო-ანალიტიკური ჯგუფის ხელმძღვანელი ლაშა ბერულავა იტყობინება, ოკუპანტების გააქტიურება სამოქალაქო დამკვირვებლებმა შეამჩნიეს, რომლებიც ტერიტორიას სპეციალური აღჭურვილობით აკვირდებიან. „ამასთან, ოკუპანტები არ ჩამოსულან დასახლებულ ზოლში ან მაგისტრალთან ახლოს. სავარაუდოდ, მათაც სათვალთვალო მოწყობილობები ჰქონდათ, ხოლო ყარაფილასთან ევროკავშირის სადამკვირვებლო მისიის მანქანების გამოჩენისთანავე ბაზაზე გაბრუნდნენ.".

შეგახსენებთ, რომ მეშვიდე დღეა ,,ძალა ერთობაშია"-ს აქტივისტები საოკუპაციო ზოლზე სამოქალაქო მონიტორინგს აწარმოებენ.