2017-07-19 11:11

უკრაინის პრეზიდენტის პეტრო პოროშენკოს განცხადებით, ექსტრადირების საკითხის განხილვაში, ვისაც უნდა ეხებოდეს ეს, პრეზიდენტი არ ერევა.

სწორედ ამით ახსნა პოროშენკომ "საზოგადოებრივ მაუწყებელთან" ინტერვიუში ის ფაქტი, რომ მან ინფორმაციის გადამოწმებამდე არ იცოდა, თუ საქართველოს ხელისუფლებამ უკვე მიმართა უკრაინას მიხეილ სააკაშვილის ექსტრადირების მოთხოვნით.

პეტრო პოროშენკოს განცხადებით, უკრაინამ სააკაშვილის ექსტრადიციის მოთხოვნაზე უარით უპასუხა და დამატებითი ინფორმაცია მოითხოვა. უკრაინის პრეზიდენტი ამბობს, რომ ეს არის გენერალური პროკურორის პრეროგატივა, რომელიც ყურადღებით შეისწავლის საკითხს და მიიღებს გადაწყვეტილებას. მისი თქმით, არანაირი მნიშვნელობა არა აქვს სახელებსა და გვარებს:

„ახლა გადავამოწმე ინფორმაცია და უკრაინამ გასცა ექსტრადირებაზე უარყოფითი პასუხი და მოითხოვა დამატებითი ინფორმაცია. ჩვენ არ განგვიხილავს ექსტრადირების საკითხი ვიზიტის დროს, მაგრამ თუ ეს მომავალში მოხდება, ეს იქნება ძალოვანი სტრუქტურების და გენერალური პროკურორის პრეროგატივა, რომელიც ძალიან ყურადღებით განიხილავს ნებისმიერი დამნაშავის ექსტრადირების მოთხოვნას და ჩვენ დიდი სიამოვნებით ვითანამშრომლებთ საქართველოსთან ნებისმიერი დანაშაულის გამოძიებაში.
თუმცა, მე ამაში არ ვერევი.

პერსონალურად არავინ განგვიხილავს, მათ შორის არც სააკაშვილი. ზოგადად სახელებს და გვარებს არ აქვს მნიშვნელობა, თუ დადასტურდება კრიმინალი, ცხადია, მოვიქცევით შესაბამისად“, - განაცხადა პეტრო პოროშენკომ.