2017-07-19 11:09

გაეროში საქართველოს ახალგაზრდობის წარმომადგენელის მეუღლე ვახო თურნავა "ქართველთა მარშის" ორგანიზატორთა და მხარდამჭერთა ნაწილის მხრიდან თათია დოლიძის მიმართ შეურაცხმყოფელ და მუქარის შემცველ კომენტარებს ეხმაურება.

"ყველა იმ გარეწარს, ვინც ემუქრება ჩემს ოჯახს და იკადრა ჩემს მეუღლეზე ეს ენით აუღწერელი სიბინძურის დაწერა! ძალიან მალე გაირკვევა სიმართლე და არცერთს არ შეგრჩებათ! სიტყვები არ მყოფნის, რა უნდა დავუძახო თქვენს საქციელს, ქვეყნის დამქცევი ნ...ი ხართ…

რაც შეეხება ლიბერალიზმის მამებს, შეწყვიტეთ ვითომდა სოლიდარობის გამოცხადება, ამის მორალური უფლებაც კი არ გაქვთ. თქვენ იმათ გამოუცხადეთ სოლიდარობა ვისი ოჯახებიც მიწასთან გაასწორებული გყავდათ წლების მანძილზე", – წერს სოციალურ ქსელში ვახო თურნავა.

შეგახსენებთ, თათია დოლიძის მიმართ სავარაუდო მუქარის ფაქტზე შს სამინისტრომ გამოძიება სსკ-ს 151-ე მუხლითა დაიწყო, რაც მუქარას გულისხმობს და ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე, ან გამასწორებელი სამუშაოთი ვადით ერთ წლამდე ანდა თავისუფლების აღკვეთით ვადით ერთ წლამდე.

გაეროში საქართველოს ახალგაზრდობის წარმომადგენელის თათია დოლიძის მიმართ სოციალურ ქსელში ძალადობრივი მუქარა გაჟღერდა. კერძოდ, თათია დოლიძე თბილისში ჩატარებულ "ქართველთა მარშს" სოციალურ ქსელში გამოეხმაურა, რასაც აქციის ორგანიზატორების მხრიდან ძალადობრივი მუქარის შემცველი საჯარო კომენტარები მოჰყვა.

"ფეისბუქ პოსტში", რომელიც ახლა უკვე წაშლილია, მარშის ორგანიზატორები, პატრიოტთა ალიანსის წევრი კონსტანტინე მორგოშია, გია კორკოტაშვილი და მიხეილ ამისულაშვილი თათია დოლიძეს გაუპატიურებით ემუქრებიან.