2017-05-23 14:25

ინგლისის ქალაქ მანჩესტერში მომხდარ აფეთქებას 22 ადამიანი ემსხვერპლა 60 კი დაშავდა. მედიის ინფორმაციით, კონცერტზე მყოფი მაყურებლის დიდ ნაწილს ბავშვები და ახალგაზრდები შეადგენდნენ.

მათ შორის იყვნენ ლივერპულის მერის შვილებიც. როგორც სტივ როთერამმა „ტვიტერზე“ დაწერა, ბავშვებს ცოტა ხნის წინ ესაუბრა და ისინი უსაფრთხოდ არიან.

აფეთქების შედეგად არ დაშავებულა ამერიკელი პოპმომღერალი არიანა გრანდე. ამის შესახებ მედიას მისმა წარმომადგენელმა განუცხადა. აფეთქების ზუსტი მიზეზი ჯერჯერობით უცნობია, თუმცა ჩრდილო-დასავლეთის ანტიტერორისტული განყოფილება მომხდარს შესაძლო ტერორისტულ თავდასხმად აფასებს.

შეგახსენებთ, მანჩესტერ არენაზე, ამერიკელი პოპმომღერლის კონცერტის დასრულებისას, როდესაც მაყურებელი დარბაზს ტოვებდა, აფეთქება მოხდა. პოლიციის ინფორმაციით, აფეთქებას მანჩესტერ არენას ფოიეში ჰქონდა ადგილი. თვითმხილველების თქმით, მათ რამდენიმე აფეთქების ხმა გაიგეს, რის შემდეგაც დარბაზი პანიკამ მოიცვა.