2017-05-22 09:36

ტელეკომპანია "ობიექტივის" ჟურნალისტი პოლიციელებს ფიზიკურ შეურაცხყოფაში ადანაშაულებს. გიორგი დარასელიას მტკიცებით, პატრულმა უფლებამოსილებას გადაამეტა, როდესაც ის ერთ-ერთ მოქალაქეს გამოესარჩლა. ჟურნალისტი დაკავების ამსახველ ფოტომასალას ავრცელებს.

დარასელია ამბობს, რომ ის სამართალდამცავებმა ძალის გამოყენებით გადაიყვანეს შინაგან საქმეთა სამინისტროს ტერიტორიაზე, სადაც ხელბორკილებით რამდენიმე საათის განმავლობაში იმყოფებოდა, შემდეგ კი სასამართლომ 500 ლარიანი ჯარიმის საფუძველზე გაათავისუფლა.

ჟურნალისტის მტკიცებით, გადაწყვეტილება მოსამართლემ მოწმეების ჩვენებების გათვალისწინების გარეშე მიიღო. დარასელია სასამართლოს გადაწყვეტილების გასაჩივრებას გეგმავს.

"ობიექტივის" ჟურნალისტის ბრალდებებს პასუხობენ შინაგან საქმეთა სამინისტროში. უწყებაში აცხადებენ, რომ გიორგი დარასელიამ საპატრულო პოლიციას სამუშაოს შესრულების საშუალება არ მისცა და ის კანონის ყველა წესის დაცვით, პოლიციისთვის დაუმორჩილებლობის მუხლით დააკავეს.