სტრასბურგის ადამიანის უფლებათა დაცვის სასამართლოს მოსამართლის, ნონა წოწორიას ძმა, ოთარ წოწორია ბათუმში, მის სახლში ჩატარებულ ჩხრეკას დის საქმიანობას უკავშირებს და მიიჩნევს, რომ ანგარიშსწორებას აქვს ადგილი.
ოთარ წოწორიას განცხადებით, ამოღებული ნივთებიდან მხოლოდ ორი სანადირო თოფია მისი საკუთრება. მისთვის უცნობია, როგორ აღმოჩნდა მის სახლში სხვა იარაღები. ის მომხდარს დის საქმიანობას უკავშირებს და ანგარიშსწორებად აფასებს.
"ჩემი დის საწინააღმდეგოდ გაკეთებულია ყველაფერი, ალბათ ანგარიშსწორებაა ყველაფერი. ჩემი და იყო ადეიშვილის მოადგილე და ალბათ ამიტომ. სანადირო თოფები ნამდვილად ჩემია, რაც არის რეგისტრირებული. მემკვიდრეობითი კუთვნილებაა. არც არასდროს მისვრია ეს თოფი და მაქვს შენახული როგორც სახსოვარი. დანარჩენი ნაპოვნი ნივთები, წარმოუდგენელია ჩემთვის საიდან და როგორ გაჩნდა ჩემთან,"-აცხადებს წოწორია.
მისივე ინფორმაციით, სამართალდამცავები მის სახლში დაახლოებით თვე ნახევრის წინაც იმყოფებოდნენ. "იყვნენ მოსულები ავტოფარეხში, შეამოწმეს დანადგარები, მოტრიალდნენ და წავიდნენ,"-განაცხადა ოთარ წოწორიამ.
ევროსასამართლოს მოსამართლის ნონა წოწორიას ძმის სახლის ჩხრეკა 4 საათის განმავლობაში გაგრძელდა. ექსპერტ-კრიმინალისტებმა ადგილი უკომენტაროდ დატოვეს. შინაგან საქმეთა სამინისტროს განმარტებით, ჩხრეკა ადვოკატის თანდასწრებით, ოპერატიული ინფორმაციის საფუძველზე, ჩატარდა.
უწყების ინფორმაციით, ამოღებულია პისტოლეტი და სხვადასხვა კალიბრის ვაზნები, რომელსაც ექსპერტიზა ჩაუტარდება. გამოძიება ცეცხლსასროლი იარაღის მართლსაწინააღმდეგო შეძენა-შენახვა-ტარების მუხლით დაიწყო.