2017-05-16 14:35

„ადგილობრივმა ხელისუფლებამ იური ლუჟკოვთან მიმართებით, გასაგები მიზეზების გამო, ვერ გაბედა ოკუპირებული ტერიტორიების შესახებ კანონით გათვალისწინებული სანქციების რეალურად გამოყენება", - ამის შესახებ განცხადებაშია ნათქვამი, რომელსაც რუსეთის საგარეო საქმეთა სამინისტრო ავრცელებს.

განცხადებაში საგარეო უწყება თავის მოქალაქეებს აფრთხილებს საქართველოში გამგზავრების შემთხვევაში მოსალოდნელ პრობლემებთან დაკავშირებით.

„ადგილობრივმა ხელისუფლებამ იური ლუჟკოვთან მიმართებით, გასაგები მიზეზების გამო, ვერ გაბედა ოკუპირებული ტერიტორიების შესახებ კანონით გათვალისწინებული სანქციების რეალურად გამოყენება და საკუთარი „ვერდიქტი“ მას შემდეგ გამოაცხადა, რაც მან „სტუმართმოყვარე საქართველო“ დატოვა. თუმცა, ბოლო წლებში, სამწუხაროდ, იყო სხვა შემთხვევებიც - რუსეთის მოქალაქეები ანალოგიურ სიტუაციაში არაერთხელ დაქვემდებარებიან ჯარიმებს და თავისუფლების აღკვეთასაც კი“, - ნათქვამია განცხადებაში.

„როგორც ვხედავთ, ოფიციალური თბილისი განაგრძობს სისტემატურ პროვოკაციებს, რომელიც ძირს უთხრის რუსეთთან ურთიერთობის გაჯანსაღების პროცესს. ძნელია რაციონალურად ასეთი ქმედების ახსნა - ქართულ-რუსულ ნორმალიზებას ხომ საგრძნობი მოგება მოაქვს ეკონომიკისა და საქართველოს მოქალაქეებისთის“, - აცხადებს რუსეთის საგარეო უწყება.

შეგახსენებთ, რომ მოსკოვის ყოფილი მერი, იური ლუჟკოვი საქართველოში მეუღლესთან ერთად იმყოფებოდა და იმის მიუხედავად, რომ არაერთგზის აქვს დარღვეული საქართველოს კანონი "ოკუპირებული ტერიტორიების შესახებ", საზღვარი უპრობლემოდ გადმოლახა. მისი მასპინძელი ქანდის მონასტერში მამა სერაფიმე იყო, მოგვიანებით კი წყნეთში რესტორანი "წისქვილი".

შსს-მ განაცხადა, რომ იური ლუჟკოვი კანონდამრღვევთა სიაში არ ყოფილა და ამ სიაში შეიყვანენ, რის შემდეგაც ის საქართველოში ჩამოსვლას ვერ შესძლებს.