დედაქალაქის მერი, დავით ნარმანია, ოთარ ფარცხალაძის კომპანიისთვის მიწის მიყიდვასთან დაკავშირებით კომენტარს აკეთებს.
ნარმანია ამბობს, რომ ბრალდებები უსაფუძვლოა და ყველაფერი კანონმდებლობის, წესებისა და პროცედურების დაცვითაა განხორციელებული. მისივე თქმით, დეტალური კომენტარის გაკეთება, მხოლოდ აუდიტის სამსახურის დასკვნის შემდეგ იქნება შესაძლებელი.
"როგორც კი აუდიტის დასკვნა გამოქვეყნდება და ვნახავთ, რასაკვირველია, შევძლებთ გავაკეთოთ დეტალური კომენტარი. წინასწარ კომენტარის გაკეთება, ჩემი აზრით, მიზანშეწონილი არ არის. ჩემს ხელთ არსებული ინფორმაციით, ყველაფერი კანონმდებლობის, წესებისა და პროცედურების დაცვითაა განხორციელებული. ასე რომ, არამგონია რაიმე სამართალდარღვევას ჰქონდეს ადგილი",- განაცხადა ნარმანიამ.
შეგახსენებთ, რომ დღეს "ნაციონალურმა მოძრაობამ" ის დოკუმენტები გაასაჯაროვა, რომელსაც აუდიტის სამსახური შეისწავლის და რომელიც ფარცხალაძისთვის მიწის გადაცემის საკითხს ეხება. დოკუმენტები პარტიის ერთ-ერთმა ლიდერმა, ირაკლი ნადირაძემ დღეს გამართულ საგანგებო ბრიფინგზე გაასაჯაროვა.
ირაკლი ნადირაძის ინფორმაციით, საქმე ეხება მიწის ნაკვეთს, რომელის ადგილმონაცველობასაც ამჟამად ოთარ ფარცხალაძის კუთვნილებაში მყოფი კომპანია 2010 წლიდან ითხოვდა, თუმცა, მოთხოვნა თბილისის მერიამ მხოლოდ მას შემდეგ დააკმაყოფილა, რაც კომპანიის მფლობელი ყოფილი მთავარი პროკურორი გახდა. ნადირაძის თქმით, ოთარ ფარცახალაძე მიწის ნაკვეთზე, სადაც რეკრეაციული სივრცის მოწყობა იგეგმებოდა, ოთხი ოცსართულიანი კორპუსის მშენებლობას გეგმავს.
