2017-05-12 13:35

ქართველი მებრძოლი უკრაინაში საკუთარი ინიციატივით, მოხალისედ იყო წასული - ამის შესახებ თავდაცვის სამინისტროში უკრაინაში დაღუპულ ქართველ მებრძოლთან დაკავშირებით აცხადებენ.

ინფორმაციას "ინტერპრესნიუსი" ავრცელებს და მათივე ინფორმაციით, უკრაინაში დაღუპულ მებრძოლს, სამხედრო სამსახური წლების წინ აქვს გავლილი, თუმცა, ის ახლა საქართველოს შეიარაღებულ ძალებში აღარ ირიცხებოდა. 

"თადარიგის ოფიცერი ნიშნავს, რომ ის გარკვეული წლების წინ მსახურობდა შეიარაღებულ ძალებში, მაგრამ ამ დროისთვის საკუთარი ინიციატივით, როგორც მოხალისე ისეა წასული. წლების წინ მას გავლილი აქვს სამხედრო სამსახური. ახლა შეიარაღებულ ძალებში აღარ ირიცხება" - განმარტეს თავდაცვის სამინისტროში.

დაღუპული პირი უკვე იდენტიფიცირებულია, თუმცა, როგორც ცნობილია, უკრაინაში მყოფი მებრძოლები დაღუპულის ვინაობას ჯერჯერობით არ ასაჯაროებენ.

შეგახსენებთ, რომ უკრაინაში შეტაკებების დროს კიდევ ერთი ქართველი მებრძოლი დაიღუპა. ინფორმაცია ამის შესახებ უკრაინის ეროვნული გვარდიის ერთ-ერთმა წევრმა სოციალურ ქსელში გაავრცელა. "კიდევ ერთი ღირსეული ქართველი ოფიცერი დავკარგეთ დღეს უკრაინაში, რუს ოკუპანტებთან ბრძოლაში",- წერს ქართველი მებრძოლი.