2017-04-03 14:07

გაზეთ "ქრონიკა პლუსის" რედაქტორმა ელისო კილაძემ "ფეისბუქზე" გამოაქვეყნა შს მინისტრის ყოფილი მოადგილის გელა ხვედელიძის ფოტო. როგორც ფოტოდან ჩანს, გელა ხვედელიძე კლინიკაშია, სადაც მას გამოკვლევა უტარდება. შს მინისტრის ყოფილ მოადგილეს სხვადასხვა დაზიანება აქვს მიღებული, მათ შორის - თავშიც. 

შეგახსენებთ, გელა ხვედელიძეს საკუთარ სახლთან, თარხნიშვილის ქუჩაზე ორი ნიღბიანი მამაკაცი დაესხა თავს, როცა ის მეუღლესთან ერთად სახლიდან გამოვიდა და მანქანაში ჩაჯდომას აპირებდა. გელა ხვედელიძის მეუღლე ვარაუდობს, რომ თავდამსხმელები მას მანქანასთან ელოდებოდნენ. მისივე თქმით, ხვედელიძეს გაუფრთხილებლად დაესხნენ თავს, შემდეგ კი მიიმალნენ. 

მომხდარ თავდასხმასთან დაკავშირებით შსს-მ გამოძიება უკვე დაიწყო სისხლის სამართლის კოდექსის 177-ე მუხლით, რაც ჯანმრთელობის განზრახ მძიმე დაზიანებას გულისხმობს. 

"ეს მაგარი ბიჭი ჩემი მეგობარი გელა ხვედელიძეა-გადარჩა, ძალიან მალე კარგად იქნება და ბევრ კარგ საქმეს გააკეთებს ჩვენი ქვეყნისთვის...", - წერს ელისო კილაძე "ფეისბუქზე", რომელმაც მანამდე დაწერა, რომ თავდასხმის თვითმხილველია. 

შეგახსენებთ, ელისო კილაძემ გუშინ გამოაქვეყნა ე.წ. "ბიოს" გაყიდვისსქემა საქართველოში, რომელიც, მისი თქმით, თავისმა წყარომ მიაწოდა. კილაძე "ბიოს" გაყიდვის მფარველებად "ერთერთი მინისტრის ძმასა" და სუს-ის უფროსის მოადგილეს სოსო გოგაშვილს ასახელებდა. ამ ფაქტის გასაჯაროვებას დილით უკვე გელა ხვედელიძეზე თავდასხმა მოჰყვა. ელისო კილაძემ "ქრონიკა პლუსის" ოფისში 15:00 საათზე საგანგებო ბრიფინგი დაანანონსა.