2016-12-01 12:36

საქართველო აპირებს შეინარჩუნოს მეგობრული ურთიერთობა დონალდ ტრამპის ადმინისტრაციასთან და აშშ-ს საკანონმდებლო ორგანოს ორივე პარტიის წარმომადგენლებთან, ამის შესახებ პრეზიდენტმა გიორგი მარგველაშვილმა ,,როიტერთან" ინტერვიუში განაცხადა.

პრეზიდენტმა რუსეთ-საქართველოს ურთიერთობაზეც ისაუბრა, მან საქართველოს ტერიტორიის ოკუპაციას "რუსეთის მიერ ისტორიულად უსამართლო ნაბიჯი" უწოდა და განაცხადა, რომ ამასთან შეგუებას ქართული საზოგადოება და მთავრობა არ აპირებს. მისივე თქმით, საქართველო ცდილობს მოსკოვთან დიალოგი რაციონალური დისკუსიის ფორმებში ჰქონდეს, შეინარჩუნოს სიმშვიდე და არ მისცეს ომის არც ერთ მონაწილე მხარეს საშუალება, რომ საქართველო რაიმე პროვოკაციაში აიყოლიოს.

"დონალდ ტრამპთან ჩვენი დღის წესრიგი იგივე რჩება. გვინდა რომ საქართველო ვაშინგტონის რადარებზე ფიქსირდებოდეს. შეერთებულ შტატებთან გაგრძელდება აქტიური თანამშრომლობა. რაც შეეხება ევროკავშირს, მიგვაჩნია რომ მათი მხრიდან ფიქრისა და შეფასებების ფაზა უნდა დასრულდეს და გადავიდნენ აქტიურ დღის წესრიგზე საქართველოსთან. რუსეთთან მიმართებაში კი გვინდა დიალოგს რაციონალური სახე ჰქონდეს და შევინარჩუნოთ მშვიდობა. რუსეთს განვიხილავთ როგორც პოტენციურად კარგ მეზობელს, მას მერე რაც საქართველოს სუვერენიტეტისა და ტერიტორიული მთლიანობის აღდგენა მოხდება,"-აცხადებს გიორგი მარგველაშვილი.