2016-09-14 09:43

შინაგან საქმეთა მინისტრის განცხადებას იმის შესახებ, რომ "ნაციონალური მოძრაობა" წინასაარჩევნოდ არეულობისთვის ემზადება, რასაც პრემიერმინისტრიც დაეთანხმა, სხვადასხვა არხზე დებატები მოჰყვა. 

ტელეკომპანია "იბერიის" ეთერში დებატების დროს მეგი გოცირიძე და ბადრი შუბლაძე დავით ფაცაციასა და ლადო სადღობელაშვილს დაუპირისპირდნენ. მეგი გოცირიძის განცხადებით, შინაგან საქმეთა მინისტრისა და სხვა პირების განცხადებები მხოლოდ იმ მიზანს ემსახურება, რომ ისევ გაგრძელდეს მივარდნები ენმ-ს ოფისებთან:

"მთელი ეს განცხადებები ემსახურება მხოლოდ ერთ მიზანს, რომ გამოიყვანონ კორკოტები-შმორკოტები და მოგვივარდნენ ოფისებში. ამას აკეთებს ლადო, რომელსაც სუსი უხდიდა და ახლა კი აღარ არის ღარიბაშვილი, ახლა არ ვიცი, ვინ უხდის, ა, ჰო, ირმა უხდის გროშებს - თქვენ მოდიოდით ჩვენს ოფისთან, გვიღებავდით ფასადს, ისროდით ქვებს..."

"არ გაინტერესებთ, ეს რატომ ხდებოდა?", - შეაწყვეტინა ლადო სადღობელაშვილმა მეგი გოცირიძეს, - "იმიტომ რომ აუპატიურებდით ხალხს ციხეში..."

"შენ გაუპატიურებული ხარ?", - შეეკითხა მეგი გოცირიძე ლადო სადღობელაშვილს, რაზეც ამ უკანასკნელმა უპასუხა, რომ გაუპატიურებული არ არის: "მე არ ვარ, მე არ ვყოფილვარ ციხეში". 

"არ ვიცი, ვისაც ვკითხე, ყველა უარს ამბობს და ვინაა აბა ეგეთი, მეც მაინტერესებს", - აღნიშნა მეგი გოცირიძემ "პრიორიტეტის" ეთერში.