2014-02-11 22:10

სასჯელაღსრულების გეგუთის დაწსებულების ეზოში ცოტა ხნის წინ ოცამდე „სად“ წარწერის მანქანები შეიყვანეს და ისე განალაგეს, რომ შესასვლელთან თავმოყრილი პატიმართა ახლობლებისა და ჟურნალისტების თვალთახედვის არიდან შენობების შესასვლელები დაეფარათ.

ამის შესახებ „აფხაზეთის ხმას“ გეგუთიდან აცნობეს. პატიმართა ახლობლები, რომლებიც ამ დრომდე არიან გარე პერიმეტრზე, შიშობენ, რომ ეს სპეცრაზმის შეყვანისწინა ბოლო სამზადისზე მეტყველებს.

მანამდე „აფხაზეთის ხმას“ უთხრეს, რომ ადმინისტრაციამ უკვე შეადგინა „გასაკრეჭი“ პატიმრების 23 კაციანი სია, სადაც, ძირითადად, მაყურებლები და კრიმინალური სამყაროს წევრობისთვის დაკავებულები შედიან. პატიმართა ოჯახის წევრები აცხადებენ, რომ ამ პატიმრების გამოყვანას ციხიდან ისე ვერ შეძლებენ, თუ იქ სპეცრაზმი არ შეიყვანეს.

გეგუთის ციხესთან მობილიზებულია საპატრულო პოლიციის ეკიპაჟები. იქვე იმყოფებიან შსს–ს სხვა თანამშრომლები. სიტუაციის გართულება ყოველ წუთს არის მოსალოდნელი.

შეგახსენებთ, რომ გეგუთის ციხის ადმიონისტრაციის შეცვლის მოთხოვნით 800–დე პატიმარი, უკვე რამდენიმე დღეა შიმშილობს. ათზე მეტმა პატიმარმა თვითდაზიანებები მიიყენა და საავადმყოფოებში გადაიყვანეს. დღეს შიმშილობისგან დაუძლურებული კიდევ სამი პატიმარი სასწრაფო დახმარების მანქანამ ქუთაისში გადაიყვანა.