„ქრონიკა+“-ის რედაქტორი ელისო კილაძე ინფრასტრუქტურის მინისტრის მოადგილის, ნოდარ ჯავახიშვილის იმ განცხადებას გამოეხმაურა, რომლის მიხედვითაც „გზების ტენდერებში ბევრი ფული ტყდება“.
კილაძის თქმით, ტენდერების სკანდალში საქართევლოს პრემიერ-მინისტრის გარემოცვაა გარეული, რის გამოც საქმეში საგამოძიებო უწყების ჩართვა ჯერ-ჯერობით არ ხდება.
„მე ადრეც ვთქვი: ნოდარ ჯავახიშვილი ინფრასტრუქტურის სამინისტროში დაინიშნა იმიტომ, რომ მას ბოლომდე გაერკვია ტენდერების საკითხი.
მათ შორის იმ ტენდერებზე სავარაუდო დროც დავასახელე, როდესაც ტენდერების შედეგად პირობების შესრულების ვადა იწურებოდა. ანუ როდესაც უნდა ჩაბარდეს ის სამუშოაები, რომელიც ტენდერის პირობებით არის გაწერილი.
როგორც აღმოჩნდა ეს ინფორმაცია იყო სწორი, ნოდარ ჯავახიშვილმა გააკეთა განცხადება, რომ ტენდერებიდან თანხა ტყდება. რა თანხაა ეს და რომელი ტენდერებიდან, ამას დიდი ფილოსოფია არ სჭირდება, იმიტომ, რომ ბოლო ორი წლის განმავლობაში ყველა მსხვილი ტენდერი მოგებული აქვს შს მინისტრის ყოფილი მოადგილის, გიორგი ზედელაშვილის დედის კომპანიას „სერპანტინს“.
აქედან გამომდინარე, როგორც ჩანს ნოდარ ჯავახიშვილის სამიზნე გახლავთ ამ ჩინოსნების კომპანიები. აქ დასამალი არაფერია და მე მგონი მთელმა საქართველომ იცის , რომ ერთ-ერთ მფარველად და მოტეხილი თანხის ადრესატად განიხილებოდა პრემიერ-მინისტრის ცოლის მამიდაშვილი, „ქართული ოცნების“ ყოფილი აღმასრულებელი მდივანი ზვიად ჯანყარაშვილი.
ის, რომ პროკურატურას ჯერჯერობით რეაქცია არ აქვს, განპირობებული სწორედ იმით, რომ პრემიერ-მინისტრის ახლო გარემოცვასთან მიდის ის მოტეხილი თანხები, ჩემი ვარაუდით. თუმცა ჯავახიშვილის ეს განცხადება, მაფიქრებინებს იმას, რომ ეს პროცესი აუცილებლად დაიწყება და დაჩქარდება, იმიტომ, რომ ნოდარ ჯავახიშვილი გახლავთ ბიძინა ივანიშვილის ნდობით აღჭურვილი პირი და ის „ქართუ ბანკიდან“ თანამდებობაზე აღმოჩნდა მხოლოდ იმ ნიშნით, რომ რეალური სურათი მიაწოდოს პირველ მოქალაქეს იმ ფონზე. რაც ქვეყანაშია.
არ გამოვრიცხავ, რომ დაიწყება სისხლისამართლებრივი დევნა მოქმედი მაღალჩინოსნების წინააღმდეგ და ეს პირველ რიგში შესაძლებელია იყო ინფრასტრუქტურის მინისტრი და გზების დეპარტამენტის ხელმძრვანელი, რომელიც პირადად ზვიად ჯანყარაშვილის მფარველობით მოვიდნენ ამ თანამდებობებზე,“ - აცხადებს ელისო კილაძე.
pirveliradio.ge
