-
2015-01-01 09:32
39 წლის ე.წ. კანონიერი ქურდი ლაშა ჯელაძე, იგივე "რაჭა" მინსკში დააკავეს და ამჟამად უკვე დეპორტირებულია. ამის შესახებ "პრაიმკრაიმი" წერს. ამავე გამოცემის ცნობით, ჰოსპიტალში მოხვედრილ სხვა კრიმინალურ ავტორიტეტს, "რაჭას" სეხნიას ლაშა ბარათელს იგივე "ჭიას", სავარაუდოდ, დააკავებენ.
"რაჭა" ანუ ლაშა ჯელაძე მინსკში დააკავეს, საიდანაც ის მოსკოვში ჩასვლას და იქ "ქურდების" შეკრებას გეგმავდა იმაზე სასაუბროდ, ვინ იყო საბერძნეთში მომხდარი თავდასხმის ორგანიზატორი და მონაწილე, როცა თავად ჯელაძე სასწაულებრივად გადაურჩა სიკვდილს.
გავრცელებული ინფორმაციით, ჯელაძე ტაქსით შინ ბრუნდებოდა, როცა მას ორმა უცნობმა დაუძახა. მათგან ერთმა მიახლოებისთანავე მუცელში ჩაარტყა დანა "კანონიერ ქურდს", ხოლო მეორე დარტყმის არიდება ჯელაძემ მოახერხა, თუმცა, დანის მჭრელ პირზე ხელები დაისერა. მესამეჯერ მოქნეული დანის პირი, როგორც ჯელაძე ჰყვება, გულზე ჩამოკიდებულმა წმინდა გიორგის მედალიონმა აისხლიტა...
რაც შეეხება 25 წლის ლაშა ბარათელს, იგივე "ჭიას", ისიც, ლაშა ჯელაძისა არ იყოს, "ანტიჰასანისტების" დაჯგუფებიდანაა და როგორც ჩანს, სწორედ "ჰასანისტებმა" ("დედ ჰასანის" მიმდევრები), საკუთარი კორპუსის სადარბაზოში, სასტიკად სცემეს, სახე დაუსერეს და იქვე დატოვეს.
როგორც აღმოჩნდა, ბარათელი საქართველოს მხრიდან იძებნებოდა, რის შემდეგაც გავრცელდა ცნობა, რომ "ჭიას" ექსტრადირება საქართველოში იგეგმებოდა, თუმცა, დაკავებულის თითის ანაბეჭდების გადამოწმების შემდეგ რუსმა სამართალდამცველებმა აღმოაჩინეს, რომ შესაძლოა, ბარათელი სანკტ-პეტერბურგში მომხდარი ბინის ქურდობაშიც ფიგურირებდეს, ასე რომ მას მაშინვე დააკავებენ, როგორც კი საავადმყოფოდან გამოწერენ.