წინა ხელისუფლების დროს სურამის ყოფილი რწმუნებული დავით გარადინსკი ხაშურის პოლიციას ფიზიკურ შეურაცხყოფასა და ზეწოლაში ადანაშაულებს და აცხადებს, რომ მისი ჯერ დაკავება, შემდეგ კი ცემა, პოლიტიკური მოტივით იყო განპირობებული. გარადინსკიმ ინტერვიუ "კვირის პალიტრას" მისცა. მის ცემას სსს-ს პრესცენტრში არ ადასტურებენ.
"7 დეკემბერს მეგობარებთან ერთად ვიყავი, რა დასამალია და დავლიეთ, თუმცა მთვრალი არ ვყოფილვარ. როგორც ვიცი, ქართული კანონმდებლობა ალკოჰოლის დალევას ჯერ არ კრძალავს და არა მგონია, ამით რაიმე კანონი დამერღვია. მოკლედ, მივდიოდით სახლში, როდესაც ჩვენთან მოვიდა პოლიციის მანქანა და რატომღაც გადაწყვიტეს ჩემი მეგობრის დაკავება.
შევეცადე, პოლიციელებისთვის ამეხსნა, რომ აბსოლუტურად უდანაშაულო ადამიანის დაკავება უკანონო საქციელი იყო. საბოლოოდ, ჩემის მეგობარს შეეშვნენ, მაგრამ მე სრულიად არაფრის გამო ჩამსვეს მანქანაში და წამიყვანეს ხაშურის რაიონულ განყოფილებაში, სადაც მცემეს. ხუთი პოლიციელი კარგა ხანს მირტყავდა მუშტებს, თან მიყვიროდნენ, "ნაციონალებს" ასეც მოგიხდებათო...";
"სასამართლომ ისე გამოიტანა განაჩენი, სახაზინო წესითაც არ დაუნიშნავთ ადვოკატი. საბედნიერო მოსამართლე აღმოჩნდა სამართლიანი ადამიანი, მხოლოდ 250 ლარით დამაჯარიმა, მაშინ, როცა ბრალად მიყენებდნენ პოლიციის სიტყვიერ და ფიზიკურ შეურაცხყოფას.
ჩემს დაკავებას ბევრი თვითმხილველი ჰყავს და და ყველა დამეთანხმება, რომ ჩემი მხრიდან არც სიტყვიერ და მით უფრო ფიზიკურ შეუარცხყოფას ადგილი არ ჰქონია. მხოლოდ იმიტომ არ ვიჩივლე, რომ ღვიძლი მაწუხებს, ცეროზი მაქვს, დღე-დღეზე ველოდები ვიზას და გერმანიაში მივდივარ სამკურნალოდ. შემეშინდა, რომ რაიმე პრობლემა არ შეექმნათ და გაჩუმება ვამჯობინე.
- პოლიციელებს არ უთხარით ავად რომ ხართ?
- ვუთხარი ღვიძლი მაქვს დაშლილი-მეთქი, თუმცა ეს სიცილადაც არ ეყოთ. სხეულზე ცემის კვალი აღარ მეტყობა, ალბათ იციან სად უნდა დაარტყან ადამიანს რომ არ დაულურჯდეს, თუმცა ნეკნები ახლაც მტკივა.
- ვინ გცემდათ, სახელი და გვარი თუ იცით?
- ხაშურის პოლიციაში არავის ვიცნობ. "ნაციონალური მოძრაობის" დროს ვიყავი დაბა სურამის რწმუნებული და ცემის დროს ამას მიხსენებდნენ. ვფიქრობ, ჩემი დაკავება პოლიტიკურად იყო მოტივირებული."