-
2014-01-28 20:37
ტყიბულში, მინდელის შახტში მომხდარი უბედური შემთხვევის დროს გარდაცვლილი მამაკაცი მინდელის სახელობის შახტის უფროსის მოადგილეა.
მინდელის შახტის სამმართველოს თანამშრომელმა „აფხაზეთის ხმას“ უთხრა, რომ წინასწარი ინფორმაციით, მან ნახშირით დატვირთული ვაგონების გადაადგილების დროს წაიფორხილა, წაიქცა და ლიანდაგზე დაეცა.
„ის შახტის უფროსის მოადგილე იყო და სამუშაოების მიმდინარეობას ეცნობოდა. სხვებს აფრთხილებდა, ვაგონებს მოერიდეთო და თავად წამოჰკრა ფეხი რაღაცას“, - აცხადებს „აფხაზეთის ხმის“ რესპოდენტი.
ამასთან, კომპანია „ საქანახშირი“ ტყიბულის მინდელის სახელობის შახტაში მომხდარ შემთხვევასთან დაკავშირებით განცხადებას ავრცელებს, რომელსაც „აფხაზეთის ხმა“ გთავაზობთ:
„2014 წლის 28 იანვარის 16 საათზე ტყიბულის მინდელის სახელობის შახტის ნულოვან ჰორიზონტზე მოპოვებული ნახშირის ტრანსპორტირებისას დაიღუპა შახტის უფროსის მოადგილე ტარიელ ქასრაშვილი.
საწარმოს ადმინისტრაციის გადაწყვეტილებით, შეიქმნა მიზეზების დამდგენი კომისია, რომელიც ადგილზე მუშაობს და მიმდინარეობს მოკვლევა. კომპანია „საქნახშირის“ ადმინისტრაცია და შრომითი კოლექტივი მწუხარებას გამოთქვამს და უთანაგრძნობს გარდაცვლილის ოჯახს.
ამასთან „ საქნახშირი“ და შესაბამისი სადაზღვევო კომპანია უბედურ შემთხვევასთან დაკავშირებული ხარჯების ანაზღაურებას საკუთარ თავზე იღებენ“, - ნათქვამია განცხადებაში.