2014-11-24 13:23

როგორც პუბლიცისტი ირაკლი კაკაბაძე აცხადებს, ერთ-ერთმა ყოფილმა საჯარო მოსამსახურემ უთხრა რომ არის თემები, რომელსაც ვერც ერთი მთავრობა ვერ შეეხება: ეს არის ნარკოტიკებით ვაჭრობა, იარაღით ვაჭრობა და ტრეფიკინგი.

„ძალიან გული მწყდება და პირდაპირ გეტყვით ისეთ ადგილას სიცოცხლე აღარ მინდა, სადაც სიმართლის და სამართლიანობის ადგილი არ არის. დღეს, ერთ-ერთმა ყოფილმა საჯარო მოსამსახურემ მითხრა რომ არის რაღაც თემები, რომელსაც ვერც ერთი მთავრობა ვერ შეეხებაო: ეს არის ნარკოტიკებით ვაჭრობა, იარაღით ვაჭრობა და ტრეფიკინგი.

მთავრობები მიდიან და მოდიან და ამ თემებს ვერც ერთი ვერ ეხებაო. თუ ეს მართლა ასეა მაშინ რაღად გვინდა ასეთი ცხოვრება, სადაც ნარკოტიკის, იარაღის და ადამიანების უკანონო ვაჭრობა იქნება მუდმივი მოცემულობა - ამას ადამიანები შეეწირებიან და ჩვენ ჩუმად უნდა ვიყოთ.

მე არ მინდა ასეთი სიცოცხლე. ჩემს შვილს რა ვუთხრა: შვილო გაიზარდე კარგი ბიჭი, მაგრამ იარაღის, ნარკოტიკების და ადამიანების უკანონო გამყიდველებს უნდა დაემორჩილოო. რისთვისღა ვზრდით ამ ბავშვებს? რომ ადამიანები, იარაღი და ნარკოტიკი გაყიდოს? ეს ჩემთვის სრულიად მიუღებელია. ნურსად ნუ გამომყვებით, მე პოლიტიკური ლიდერობა არ მწადია. ჩვენს სინდისს და ნამუსს გავყვეთ ყველანი. მხოლოდ ეს გადაგვარჩენს.

ჩვენს ბავშვებს ნუ გავწირავთ ისეთ ქვეყანაში ცხოვრებისათვის, სადაც უკანონოდ იარაღის, ნარკოტიკების და ადამიანების გაყიდვა ხელშეუხებელი დოგმაა. ეს არის აუცილებელი, თუ ჩვენ ცხოვრება გვინდა.

ნურსად გამომყვებით და ნურსად დამიწყებთ ძებნას - მე პოლიტიკოსი არ ვარ და არც არასდროს ვიქნები - ეს თქვენი გადასაწყვეტია, ჩემო საყვარელო ხალხო.

გინდათ თუ არა ცხოვრება მკლელობის გამყიდველთა ქვეყანაში?",- წერს ირაკლი კაკაბაძე.