საქართველოს პრემიერ-მინისტრი გიორგი გახარია მსოფლიო ბანკს და საფინანსო ინსტიტუტის რეგიონულ დირექტორს სამხრეთ კავკასიაში სებასტიან მოლინეუსს მხარდაჭერისთვის მადლობას უხდის. მსოფლიო ბანკის მიერ COVID-19-ის პანდემიაზე რეაგირებისთვის საქართველოს დასახმარებლად 80 მილიონ აშშ დოლარის გამოყოფას მთავრობის მეთაური სოციალურ ქსელ “ტვიტერში“ ოფიციალურ გვერდზე ეხმაურება.

გორის სამხედრო ჰოსპიტალში კორონავირუსი დაუდასტურდა სანიტარს. ის გორის მუნიციპალიტეტის სოფელ თერგვისში ცხოვრობს.

დიდ ბრიტანეთში კორონავირუსით ჯანდაცვის 108 მუშაკი გარდაიცვალა,  ამის შესახებ ქვეყნის საგარეო საქმეთა მდივანმა დომინიკ რააბმა დიდი ბრიტანეთის წარმომადგენელთა პალატას განუცხადა.

„ევროპულმა საქართველომ“ კრიზისის მართვის საკუთარი გეგმა წარადგინა. როგორც პარტიის ლიდერები განმარტავენ, ხელისუფლების მეირ დაანონსებული 3 მილიარდ ნახევრიანი დახმარების პაკეტი საკმარისი არ არის.

გერმანიამ საერთაშორისო მოგზაურობაზე აკრძალვა 14 ივნისამდე გაახანგრძლივა. ამის შესახებ ქვეყნის საგარეო საქმეთა მინისტრმა, ჰეიკო მასმა განაცხადა. „ჩვენ ჯერ იმ ეტაპზე არ ვართ, რომ მოგზაურობის რეკომენდაცია გავცეთ. აუცილებელია მოგზაურობის აკრძალვა ივნისის შუა რიცხვებამდე გაგრძელდეს“,-განაცხადა მაასმა.

ევროკომისიის ევროპული სამეზობლო პოლიტიკისა და გაფართოების საკითხებში გენერალური დირექტორატის ხელმძღვანელის მოადგილემ, კატარინა მატერნოვამ კორონავირუსთან წარმატებული ბრძოლის მაგალითად საქართველო დაასახელა.

საქართველოს ჯანდაცვის მინისტრის, ეკატერინე ტიკარაძის განცხადებით, ინდივიდუალურად, კომისიური წესით განიხილება იმ პირთა დოკუმენტაცია, რომლებიც არ არიან რეგისტრირებული შემოსავლების სამსახურში და სხვადასხვა საქმიანობას ეწეოდნენ.

ეკონომიკის გახსნის მიზნით, დღეს, 18:00 საათზე, ჯანდაცვის სამინისტროს ოფიციალურ ვებ-გვერდზე კომპანიების რეგისტრაცია სპეციალური აპლიკაციის საშუალებით დაიწყება. როგორც შრომის ინსპექტირების დეპარტამენტის უფროსი ბექა ფერაძე აცხადებს, კომპანიები იმ დღესვე გაიგებენ თავიანთ სტატუსს, რამდენად აკმაყოფილებენ ჯანდაცვის მინისტრის რეკომენდაციებს, იმისთვის, რომ საქმიანობა დაიწყონ. მისივე თქმით, თუ რომელიმე კომპანიას ხარვეზები დაუფიქსირდება, ის მიიღებს დამატებით რეკომენდაციებს და მიეცემა შესაძლებლობა, რომ გაასწორონ ხარვეზები.

გერმანულმა კომპანია „ბიოენტექმა“, რომელიც „კოვიდ-19“-ის ვაქცინაზე ამერიკულ ფარმაცევტულ კომპანია „ფაიზერთან“ ერთად მუშობს, ადამიანებზე ტესტირება უკვე დაიწყო. კომპანია „ფაიზერში“ აცხადებენ, რომ შემდეგი კვირიდან ტესტირებები ამერიკაშიც დაიწყება. ამის შესახებ ინფორმაციას „უოლ სტრიტ ჯორნალი“ ავრცელებს.

პარტიის „სამართლიანობისთვის“ თავმჯდომარე ეკა ბესელია „კოვიდ-19“-ის წინააღმდეგ კონტროლისა და მონიტორინგის განხორციელების მიზნით, დროებითი საპარლამენტო კომისიის შექმნას ითხოვს.