ინფექციური საავადმყოფოს სამედიცინო დირექტორის მარინა ეზუგბაიას განცხადებით, 22 ახალი ინფიცირებული პაციენტიდან ერთი მედიკოსია. ეზუგბაიას განმარტებით, კორონავირუსით ინფიცირებული ექიმების რაოდენობა საქართველოში მცირეა.

„როგორც ჩემთვის ცნობილია, 22 შემთხვევიდან მედპერსონალიდან მარტო ერთი არის ინფიცირებული. აღნიშნული პაციენტი ჩვენ კლინიკაში არ მოთავსებულა. როგორც ჩემთვისაა ცნობილი, ინფიცირებული მედიკოსების ციფრი დიდი არ არის, მედპერსონალი ეტყობა მეტ-ნაკლებად, თავდაცვის საშუალებებს სწორად და ადკეტვატურად იყენებს. შესაბამისად, ჩვენთან მედიკოსების ინფიცირების ხარისხი დაბალია და ვიმედოვნებთ, ასე გაგრძელდება“, - განაცხადა ეზუგბაიამ.

მისივე განმარტებით, თუკი, ახლა ჩვენს ქვეყანაში პანდემიის პიკური პერიოდია და სიტუაცია ამ მონაცემებით შენარჩუნდება, ეს მედიკოსებს სიტუაციის კონტროლის საშუალებას მისცემს.

„ჩვენ კიდევ ვლაპარაკობთ, რომ შიდა გავრცელებიდან 7-8 კვირა არის ის, რასაც პიკი ჰქვია და დაახლოებით, ამ პერიოდში შევდივართ. თუ ასე შევინარჩუნებთ მდგომარეობას, ეს ცუდი მონაცემები არ არის. თუ ეს ჩვენი პიკური მონაცემია, ცუდი არ არის, თუ ასე გაგრძელდება, ზომიერ, კონტროლირებად მატებას შევინარჩუნებთ და ეს მოგვცემს სიმშვიდის საშუალებას. ამ ეტაპზე, როგორც გუშინ, 3 მძიმე პაციენტი გვყავს მძიმე პნევმონიით, ერთ-ერთი მათგანი ასაკობრივადაა რისკ ჯგუფში, მეორესთან თანმდევი დაავადებაა დიაბეტის სახით, დანარჩენების მდგომარეობა უკვე საშუალო და მსუბუქია“, - განაცხადა ეზუბაიამ.

საქართველოში კორონავირუსით ინფიცირების შემთხვევათა რაოდენობა 22-ით გაიზარდა და 539 გახდა. ამის შესახებ ინფორმაცია მთავრობის მიერ შექმნილ სპეციალურ ვებ-გვერდზე stopcov.ge-ზე არის განთავსებული. კარანტინის რეჟიმშია 5256 ადამიანი, ხოლო სტაციონარში მეთვალყურეობის ქვეშ - 548 პირი.

 საქართველოს პრემიერ-მინისტრი გიორგი გახარია მსოფლიო ბანკს და საფინანსო ინსტიტუტის რეგიონულ დირექტორს სამხრეთ კავკასიაში სებასტიან მოლინეუსს მხარდაჭერისთვის მადლობას უხდის. მსოფლიო ბანკის მიერ COVID-19-ის პანდემიაზე რეაგირებისთვის საქართველოს დასახმარებლად 80 მილიონ აშშ დოლარის გამოყოფას მთავრობის მეთაური სოციალურ ქსელ “ტვიტერში“ ოფიციალურ გვერდზე ეხმაურება.

გორის სამხედრო ჰოსპიტალში კორონავირუსი დაუდასტურდა სანიტარს. ის გორის მუნიციპალიტეტის სოფელ თერგვისში ცხოვრობს.