-
2014-10-25 12:07
აშშ-ის სახელმწიფო დეპარტამენტის სპიკერი ჯენ ფსაკი აცხადებს, რომ საქართველოში მოქმედი და ყოფილი თანამდებობის პირების მიმართ აღძრული საქმეების გამო, რომლებზეც სახ. დეპარტამენტი ადრე წუხილს გამოთქვამდა, წუხილი დღემდე რჩება.
ამასთან, ფსაკის არ დაუკონკრეტებია, რომელ საქმეებს გულისხმობს, თუმცა, დაამატა, რომ აშშ განაგრძობს საქართველოს მთავრობის ყურადღების გამახვილებას პროცესუალური ნორმების დაცვასა და კანონიერების მნიშვნელობაზე, რათა პოლიტიკური შურისძიების მიზნით სასამართლო სისტემის გამოყენების აღქმა გამოირიცხოს.
"ჩვენ ყურადღებით ვადევნებთ და ვადევნებდით თვალს მოქმედი და ყოფილი თანამდებობის პირების წინააღმდეგ აღძრულ გამოძიებებს. ჩვენ განვაგრძობთ საქართველოს მთავრობისთვის პროცესის თანმიმდევრულობის, კანონის უზენაესობისა და გამჭვირვალე გამოძიების მნიშვნელობის ხაზგასმას, რათა თავიდან ავიცილოთ იმის აღქმაც კი, რომ სასამართლო სისტემა პოლიტიკური ანგარიშსწორების მიზნით გამოიყენება.
ჩვენ განვაგრძობთ საქართველოს დემოკრატიული განვითარების მხარდაჭერას, რაც უნდა მოიცავდეს პოლიტიკური პლურალიზმისადმი პატივისცემასა და ღია დებატებს. როგორც იცით, რადგან ეს ადრეც გვითქვამს,რომ ჩვენ გამოვხატეთ გარკვეული წუხილი ზოგიერთი საქმის წარმართვის შესახებ და ეს წუხილები დღემდე რჩება. არ მინდა ჩავუღრმავდე კონკრეტულ შემთხვევებს.
როგორც იცით, თითოეული მათგანი განსხვავდება, თუმცა, ზოგადად თუ ვიტყვით, იყო რიგი საქმეებისა, რომლებზეც ჩვენ, დროის გადმოსახედიდან, გამოვხატეთ წუხილი", - განაცხადა ჯენ ფსაკიმ.