შინაგან საქმეთა სამინისსტროს პრესსამსახურში აცხადებენ, რომ თბილისში, ავტობუსიდან შავკანიანი მამაკაცის გაგდებისა და მისთვის შეურაცხყოფის მიყენების შესახებ სოციალურ ქსელში გავრცელებულ ინფორმაციაზე გამოძიება დაიწყო.
გამოძიება დაწყებულია საქართველოს სისხლის სამართლის კოდექსისი 142-ე მუხლით, რაც ითვალისწინებს ადამიანთა თანასწორუფლებიანობის დარღვევას, მათი რასის, კანის ფერის, ენის, სქესის, რელიგიისადმი დამოკიდებულების, აღმსარებლობის, პოლიტიკური ან სხვა შეხედულების, ეროვნული, ეთნიკური, სოციალური, რომელიმე წოდებისადმი ან საზოგადოებრივი გაერთიანებისადმი კუთვნილების, წარმოშობის, საცხოვრებელი ადგილის ან ქონებრივი მდგომარეობის გამო.
მომხდართან დაკავშირებით, გამოძიება თვითმხილველ ქალბატონს, მწერალ ლელა კოდალაშვილსაც დაკითხავს, რომელმაც ინფორმაცია პირველმა გაავრცელა:
"დღეს, პავლოვზე, ავტობუსიდან გადმოაგდეს შავკანიანი ბიჭი. მძღოლმა სპეციალურად გააჩერა და საშუალება მისცა მგზავრებს, გადმოეგდოთ და თვითონაც მიაყოლა ერთი-ორი წიხლი. ამაოდ ყვიროდა ის ბიჭი, აი ემ ფრენჩ!-ო... ცხვირით დაათხლიშეს ასფალტს, ჩვენმა ვაჟკაცებმა საამაყო გურჯულ-ნაციონალური გინებაც მოაყოლეს, დავარდნილი ზურგჩანთაც თავში ესროლეს...
მანდილოსნის შეყვირებაც ჩამესმა: ,,ღმერთო, შენ დაგვიფარე ებოლასაგან და ამ მაზუთიანებისაგან"... მეორე ქალი: ,,პიჯაკი რომ ჩაუცვია ამ გორილას", - წერდა ლელა კოდალაშვილი.
შენიშვნა: ფოტო შერჩეულია თემატური კავშირის პრინციპით
