2014-10-24 09:12

"თავისუფალი ზონა" ავრცელებს განცხადებას, სადაც აღნიშნულია, რომ ზაზა დავითაიას ცემისთვის დაკავებული ავთანდილ კ., რომელიც დანაშაულს აღიარებს, არის "თავისუფალი ზონის" ყოფილი წევრი ავთანდილ კემულარია, რომელმაც ორგანიზაცია რამდენიმე თვის წინ დატოვა. 

"თავისუფალი ზონა" ცალსახად ემიჯნება ძალადობის გამოვლინების ყველა ფაქტს, თუმცა ეჭვობს, რომ ამ შემთხვევაშიც ადგილი ჰქონდა ზაზა დავითაიას მხრიდან მოწყობილ პროვოკაციას "თავისუფალი ზონის" წინააღმდეგ. 

"ავთო კემულარია რამდენიმე თვეა აღარ არის ,,თავისუფალი ზონის” წევრი, მაგრამ ის რომც ყოფილიყო წევრი და სასამართლოს დაედგინა მისი ბრალეულობა ძალადობაში , ჩვენ უპირობოდ დავგმობდით მის მოქმედებას, თუმც  წინა შემთხვევიდან გამომდინარე, როდესაც მან შეურაცხყოფა მიაყენა ,,თავისუფალი ზონის” წევრებს,  ფარნაოზ ჭკადუას და დავით გოგოხიას, წამოიწყო ჩხუბი და მოაწყო პროვოკაცია,  ჩნდება ეჭვი, ეს არის ზაზა დავითაიას მორიგი პროვოკაცია ,,თავისუფალი ზონის” წინააღმდეგ", - ნათქვამია განცხადებაში. 

შეგახსენებთ, რომ შსს-ს ინფორმაციით, შსს-ს ინფორმაციით, დაკავებულია პირი, რომელიც თსუ-ს პირველ კორპუსთან "ასავალ-დასავალის" ჟურნალისტის ზაზა დავითაიას ცემაშია ეჭვმიტანილი. გამოძიება ადამიანის დევნის ფაქტზე მიმდინარეობს, სიტყვის, აზრის გამო, ან და მის პოლიტიკურ-საზოგადოებრივ, პროფესიურ მოღვაწეობასთან დაკავშირებით, რომელიც ჩადენილია ძალადობით (საქართველოს სსკ-ს 156-ე მუხლის მე-2 ნაწილის „ა“ ქვეპუნქტით), რაც სამ წლამდე თავისუფლების აღკვეთას ითვალისწინებს.