2014-10-07 11:53

4 ოქტომბერს, მეტროსადგურ „300 არაგველებში“ ტრაგედია მოხდა. 27 წლის დათო გვასალია გვორაბიდან გამოსულ მატარებელს ჩაუხტა და დაიღუპა.

„დათო ძალიან ნერვიულობდა დის გამო... ფსიქიურად მანამდეც ცუდად იყო. ჯანმრთელობის პრობლემები ჰქონდა და დამამშვიდებლებს სვამდა.

დის დაღუპვამ საერთოდ ბოლო მოუღო. ეს ერთი წელი, მგონი ლოგინში არც კი ძინებია, სკამზე ეძინა, თუკი ეძინა საერთოდ, ისიც მედიკამენტების საშუალებით თუ ახერხებდა. ძალიან ცუდად იყო.

ბიჭები ამ თემაზე მას არც ველაპარაკებოდით, მაგრამ ვიცოდით, რომ მკურნალობდა. იყო რაღაც პერიოდი, როდესაც სახლიდან არ გადიოდა, რადგან სავარაუდოდ, მაშინ ფსიქიკური პრობლემები უმწვავდებოდა“ - ამბობს დათო გვასალიას მეგობარი.

ერთი წლის წინ, 2013 წელს, სიცოცხლე თვითმკვლელობით დაასრულა დათოს დამ, 22 წლის ნინო გვასალიამ, რომელიც სახლიდან 17 ოქტომბერს გავიდა და უგზო-უკვლოდ დაიკარგა... სამართალდამცველები და მეგობრები თითქმის ერთი თვის განმავლობაში ეძებდნენ. ბაიკერებმა მისი ცხედარი 10 ნოემბერს მუხათწყაროს ტყეში ჩამომხრჩვალი იპოვეს...

როგორც დათოს მეგობრები ამბობენ, ბიჭს ფსიქოლოგიური პრობლემები ადრეც აწუხებდა, დის დაღუპვის შემდეგ კი მისი მდგომარეობა კიდევ უფრო გაუარესდა.

„როგორც ამბობდნენ, მწვავე შიზოფრენიის დიაგნოზი ჰქონდა და მკურნალობდა, მაგრამ ამას თუ გააკეთებდა, მართლა არ გვეგონა, რადგან ხედავდა, დედამისი რა დღეში იყო. ნინოთი ცხოვრობდა, მის ფოტოებთან ერთად ათენებდა და აღამებდა. ბიჭებიც ძალიან ცუდ დღეში იყვნენ და როგორც ვიცი, მამაც...

სამ ძმას ნინო ერთადერთი და ჰყავდათ და ისედაც განსაკუთრებული ყურადღებით ეპყრობოდნენ. როგორც შემდეგ გაირკვა, ნინოს დათოსთვის ჰქონდა გადაკვრით ნათქვამი თვითმკვლელობის შესახებ და ამას ძალიან განიცდიდა...

ასეთ ცუდ დღეში იყვნენ ყველანი, მშობლებიანად და დათო თუ კიდევ თავის ტრაგედიას დაამატებდა, უბრალოდ ვერ ვიფიქრებდით. შოკში ვართ... ნინოს ამბავმა წელში გაწყვიტა ოჯახი. ახლა ქალბატონ ლალის ორი ვაჟი დარჩა, ამ უბედურების შემდეგ რამდენად შეძლებს მათ დედობას, არ ვიცით...

დედამ  წამლები დალია და რეანიმაციაში იყო. ცოცხალია. თუ კი შეიძლება მის მდგომარეობას სიცოცხლე ეწოდოს... ნინოსგან განსხვავებით, დათო კომპიუტერთან დროს იშვიათად ატარებდა... არადა, ერთ დროს, ძალიან თბილი, მხიარული და ბედნიერი ოჯახი იყო.

მშობლების დაშორებამ ბავშვებზე ძალიან მძიმედ იმოქმედა. თან, როგორც ამბობენ, ნინოს დაღუპვაში თავს იდანაშაულებდა, ვერ ვუპატრონე. მისთვის საკმარისი დრო არ აღმომაჩნდა და ამიტომაც „გამიფრინდაო“ ამბობდა. ზუსტად არ ვიცი, მაგრამ ითქვა, რომ ნინომ თავისი გადაწყვეტილების შესახებ მამასაც უთხრა,“ - დასძინა დათო გვასალიას მეგობარმა.

ambebi.ge