-
2014-10-05 23:56
საკრებულოს წევრი "რესპუბლიკური პარტიიდან" დავით ზურაბიშვილი აცხადებს, რომ გაკვირვებულია ხელისუფლების ზოგიერთი "სოლიდური წარმომადგენლის" კომენტარებით ევროსაბჭოს რეზოლუციაზე, ხოლო ყოფილი თავდაცვის მინისტრი, "გამამართლებელი განაჩენებით მსოფლიოს რეკორდებს ხსნის" და უკვე წელიწადნახევარია, წინასწარ პატიმრობაშია.
ამის შესახებ დავით ზურაბიშვილმა "კვირის" პრესკლუბში ისაუბრა.
დღეს უკეთესი ვითარებაა, ვიდრე წინა ხელისუფლების დროს იყო, მაგრამ, მაშინ ევროსაბჭო ხშირად ასეთი კატეგორიული არ იყო, როგორიც დღეს არის. თავდაცვის ყოფილი მინისტრი წელიწადნახევარი რომ წინასწარ პატიმრობაში გყავს, ბოლოს და ბოლოს, რაღაცას გეტყვიან.
ერთხელ არ გითხრეს, ორჯერ არ გითხრეს და ხომ უნდა იფიქრო ამაზეც. ახალაია გამამართლებელი განაჩენების რაოდენობით მსოფლიო რეკორდებს ხსნის და გინესის რეკორდებშია შესატანი. ამდენი გამამართლებელი განაჩენი ერთ ადამიანზე არასდროს დამდგარა. ეს ჩვენი სირცხვილია”, – აღნიშნა დავით ზურაბიშვილმა.
მისი განცხადებით, ხელისუფლებას უნდა თუ არა, ევროსაბჭოს რეზოლუციას ყურადღება უნდა მიაქციოს:
„ისეთმა სოლიდურმა ხალხმა თქვა, რომ ევროსაბჭოს რეზოლუციიის შესრულება არ არის სავალდებულო, ძალიან გაკვირვებული დავრჩი. იურიდიულად ეს სავალდებულო არ არის, მაგრამ ამ ლოგიკით რუსეთსაც შეუძლია გამოვიდეს და თქვას, რომ ევროსაბჭოს რეზოლუციები აფხაზეთზე და სამხრეთ ოსეთზე სავალდებულო არ არის და ფეხებზე მკიდიაო. ევროსაბჭოს წევრობა ჩვენთვის ძალიან მნიშვნელოვანია და შესაბამისად, მნიშვნელოვანია ევროსაბჭოს პოზიცია“, – განაცხადა დავით ზურაბიშვილმა.