2014-09-16 22:52

ოზურგეთის პატრული მოქალაქეებს ყალბი აპარატურით ამოწმებს, -ამის შესახებ ,,გურიის მოამბე“ წერს.

 ოზურგეთის დასუფთავების სამსახურის უფროსი, ვოვა სალუქვაძე, ოზურგეთის საპატრულო სამსახურის ერთ ერთმა ეკიპაჟმა, ქალაქ ოზურგეთში, ე.წ. "უნივერმაღის" ტერიტორიაზე, სიმთვრალის გამო დააჯარიმა,- ინფორმაცია "გურიის მოამბეს" თვითმხილველებმა მიაწოდეს.

 მათივე ინფორმაციით, სალუქვაძე საპატრულო ეკიპაჟმა სიმთვრალე-სიფხიზლეზე მაშინ შეამოწმა, როცა ეს უკანასკნელი არა ავტომობილით, არამედ ფეხით გადაადგილდებოდა.

 სალუქვაძემ ექსპერტიზა იმავე დღეს, ქალაქ ბათუმში, სამხარაულის სახელობის ექსპერტიზის ბიუროში ჩაიტარა და აღმოჩნდა, რომ ის სრულიად ფხიზელი იყო, პატრულის აპარატურა კი გამართული არ აღმოჩნდა.

ეს ინფორმაცია ვოვა სალუქვაძემ "გურიის მოამბეს" დაუდასტურა, თუმცა კონკრეტული ისტორიის მოყოლისაგან თავი შეიკავა.

როგორც გამოცემა წერს, ,,გურიის მოამბეს" რამდენიმე ადამიანი დაუკავშირდა, რომლებიც ამტკიცებდნენ, რომ პატრული მათ სიმთვრალე-სიფხიზლის პროცედურების ჩატარების შემდეგ არასამართლიანად აჯარიმებს, ისინი ფხიზელ მდგომარეობაში არიან, აპარატურა კი ნასვამ მდგომარეობას აჩვენებს.

დღეს, ოზურგეთის მუნიციპალური საკრებულოს სხდომაზე, ოზურგეთის საფინანსო საბიუჯეტო სამსახურის უფროსმა, გია მამაკაიშვილმა, განაცხადა, რომ ამ დღეებში მარტო საპატრულო პოლიციის ჯარიმებიდან ბიუჯეტში 15 ათასი ლარი შევიდა.

,,გურიის მოამბე"