2014-09-15 09:16

,,ნაციონალურ მოძრაობას“ სურს ცეცხლის ალში გახვიოს ქვეყანა. ღმერთმა გადაგვარჩინა, რომ ისინი არ არიან ხელისუფლებაში, თორემ საქართველო ომში ჩართული აღმოჩნდებოდა- ამის შესახებ საქართველოს ყოფილი პრემიერ-მინისტრი ბიძინა ივანიშვილი "კვირის პალიტრისთვის" მიცემულ ექსკლუზიურ ინტერვიუში  უკრაინაზე საუბრისას აცხადებს.

მისი თქმით, ,,ნაციონალური მოძრაობა“ საქართველოს ომში ჩართავდა , ახალი ხელისუფლება კი ადეკვატურად აფასებს მოვლენებს და რისი გაკეთებაც შეუძლია უკრაინის მხარდასაჭერად აკეთებს:

"ჩემი აზრით, აბსოლუტურად ნორმალურად შეაფასეს. მე მყავს მხედველობაში პრემიერიც, პრეზიდენტიც და პარლამენტიც. თუმცა, საუბედუროდ, `ნაციონალურ მოძრაობას~ ეს არ აძლევს ხელს. `ნაციონალურ მოძრაობას~ სურს, რომ ცეცხლის ალში იწვოდეს საქართველო, რადგან დღეს ისინი აღარ არიან ხელისუფლებაში. მათი პრობლემა გახდა საქართველო. ღმერთმა გადაგვარჩინა, რომ ისინი არ არიან დღეს ხელისუფლებაში, თორემ შესაძლოა, ამ ომში ჩართული საქართველო გვეხილა", - აღნიშნა ივანიშვილმა. 

,,ვაკეთებთ იმას, რაც შეგვიძლია. შარვლიდან ამოხტომა ვისაც უნდოდა, მან ქვეყანა საშინელ დღეში ჩააგდო. ხტებოდა კიდეც შარვლიდან და გლობალურ მოთამაშედ გვაჩვენებდა თავს. მათ რაც დამართეს ქვეყანას, კარგად დავინახეთ. ახლა ეს ბავშვები გვიკიჟინებენ, რომ ჩვენ ისევ ომში უნდა ჩავერთოთ. ამ დროს ვერც ევროპიდან და ვერ ამერიკიდან ვერ ნახავთ ვერც ერთ საყვედურს, პირიქით, აშშ-ის თავდაცვის მდივანი იყო ჩამოსული და მან მოგვიწონა რუსეთთან დაბალანსებული ურთიერთობისკენ. ასე იწონებენ სხვებიც და ჩვენი პოზიცია მისაღებია საერთაშორისო თანამეგობრობისთვის. ჩვენ ვაკეთებთ იმას, რაც შეგვიძლია, რაც არ შეგვეძლო, იმას აკეთებდა ერთი კაცი. სწორედ ამიტომ დაგვემართა წარსულში ამდენი უბედურება", - აღნიშნა ყოფილმა პრემიერ-მინისტრმა.