ქართველმა სასულიერო პირმა გამოაქვეყნა ვიდეო, სადაც აცხადებს, რომ იღებს თავისი სულიერი შვილებისგან "ყინულის გამოწვევას" და და დაავადებულ ადამიანთა ჯანმრთელობას უფალს ავედრებს.
ჯერჯერობით ეს სასულიერო პირი ერთადერთია საქართველოში, ვინც "ყინულის გამოწვევა" მიიღო და თავზე წყალი გადაისხა. მან ამსტერდამსა და თბილისში მყოფი ორი მეგობარი აქციაში მონაწილეობის მისაღებად გამოიწვია.
სამების ტაძარში მოღვაწე სასულიერო პირი ბერმონაზონი იონაა. ის 2012 წლის დასაწყისში ოკუპირებული აფხაზეთის ტერიტორიაზე ტაძრების მოსალოცად გადავიდა, რა დროსაც სეპარატისტებმა დააკავეს. ბერმა ტყვეობაში 45 დღე გაატარა. მის გასათავისუფლებლად გამოსასყიდის სახით 100.000 დოლარის გადახდას ითხოვდნენ.
მოლაპარაკების მეშვეობით ბერის ტყვეობიდან დახსნის იმედის გადაწურვის შემდეგ შსს-ში უნიკალური სპეცოპერაცია დაიგეგმა და განხორციელდა: კუდ-ის წარმომადგენლები, რომლებსაც უშუალოდ ხელმძღვანელობდა დეპარტამენტის მაშინდელი უფროსი დათა ახალაია, ასევე მაღალჩინოსნები ლევან ქარდავა, რომან შამათავა და სხვები ოკუპირებული აფხაზეთის ტერიტორიაზე გადავიდნენ, ბერ იონას ადგილსამყოფელს მიაკვლიეს და ის ტყვეობიდან გაათავისუფლეს. ოპერაციის შს მინისტრი ვანო მერაბიშვილი ხელმძღვანელობდა. დეტალები არ გახმაურებულა.
ვანო მერაბიშვილი ამჟამად პატიმრობაშია. დათა ახალაია საქართველოში არ იმყოფება და მასზე ძებნაა გამოცხადებული. ასევე პატიმრობაში იმყოფებიან ლევან ქარდავა და რომან შამათავა.
