2014-08-22 22:19

2014 წლის 13 აგვისტოს პატიმრობაში მყოფმა საქართველოს ყოფილმა თავდაცვისა და შინაგან საქმეთა მინისტრმა, ბაჩო ახალაიამ გაავრცელა განცხადება უკრაინა-რუსეთის ომში ქართველ მოხალისეთა მობილიზაციის თაობაზე.

ბევრი ამ წერილს აღფრთოვანებითა და დიდი სიხარულით შეხვდა, თუმცა საქართველოს ხელისუფლების მხარდამჭერებმა განცხადება ექსტრემისტულად მიიჩნიეს და ქართველ მოხალისეთა რეკრუტირებაში საფრთხე დაინახეს. ასევე, ბევრი თვლის, რომ ქართველებმა „სხვის ომში“ არ უნდა იბრძოლონ და არ უნდა „დაიკარგოს გენოფონდი“. ის, თუ რამდენად მნიშვნელოვანია ქართველთა მონაწილეობა ანტიტერორისტულ ოპერაციაში, ვეცდებით დავასაბუთოთ წინამდებარე პუბლიკაციაში.

საქართველო მდებარეობს კავკასიის რეგიონში. რეგიონში, რომელიც სამართლიანად მიჩნეულია ევრაზიის დენთის კასრად. გეოპოლიტიკური მდებარეობიდან გამომდინარე, კავკასია და განსაკუთრებით საქართველო მუდამ იქნება სხვადასხვა დიდი სახელმწიფოების ინტერესთა სფერო. ასეთ რეგიონში შემდგომი გადარჩენისთვის აუცილებელია ერში არსებობდეს ის აქტიური ნაწილი, რომელიც საჭიროების შემთხვევაში ბრძოლისთვის მზად იქნება.

უკანასკნელი 30 წლის განმავლობაში საქართველომ არაერთ კონფლიქტში მიიღო მონაწილეობა. სამაჩაბლოს ომი, აფხაზეთის ომი, გალისა და კოდორის მოვლენები, რუსეთ-საქართველოს ომი და ასევე სამშვიდობო მისიები კოსოვოში, ერაყსა და ავღანეთში. რუსეთის აგრესიის განმეორების რისკი საკმაოდ დიდია და იგი პირდაპირპროპორციულად დამოკიდებულია უკრაინის მოვლენებზე. რაც უფრო ხანგრძლივ კონფლიქტში ჩაებმევა რუსეთი, მით უფრო ნაკლებ რესურსებს გადმოსხავს იგი სამხრეთ ფრონტზე.

ანალოგიური ვითარება იყო იუგოსლავიაში, როდესაც ბოსნიაზე გადართული სერბეთის ფონზე შექმნილი ვითარებით ისარგებლა ხორვატიამ, სლოვენიამ და მაკედონიამ, რითაც მილოშევიჩის რეჟიმისგან თავის დაღწევა შედარებით უმტკივნეულოდ მოახერხეს.

შეიძლება ითქვას, რომ უკრაინაში მიმდინარეობს ფართომაშტაბიანი საბრძოლო მოქმედებები. ტერორისტულ ძალებს გააჩნია მძიმე, მათ შორის მუხლუხოიანი ტექნიკა, ანტისაჰაერო და ანტისატანკო დანადგარები, საარტილერიო სისტემები და რაც მთავარია, ჩეჩნეთისა და საქართველოს ომის ქარცეცხლგამოვლილი რუსი ოფიცრები. ყოველივე ეს შესანიშნავი ასპარეზია საბრძოლო გამოცდილების მისაღებად, რომელიც სამომავლოდ სახელმწიფოს მნიშვნელოვნად წარადგება. 

უკრაინაში ქართველ მებრძოლთა მონაწილეობა გაზრდის საქართველოს და ქართველი ერის ავტორიტეტს მთელი კავკასიის მაშტაბით. იმ ფონზე, როდესაც ევროპაში მცხოვრებმა ჩეჩნებმა გენერალ ისა მუნაევის მეთაურობით ჩამოაყალიბეს მოხალისეთა ბატალიონი, ქართველებმა სულ მცირე ანალოგიური მაშტაბის დანაყოფით უნდა იყოს წარმოდგენილი. ყოველივე ეს დაანგრევს რუსული პროპაგანდის მიერ შექმნილ მითს, თითქოს ქართველი ერი არ არის მებრძოლი და მხოლოდ ცეკვა-თამაში შეუძლია.

ცალკე საკიითხია ეწ „სხვისი ომი“. თუმცა, აქვე უნდა გვახსოვდეს ის უნა-უნსოს მებრძოლები, რომელნიც აფხაზეთის ომში საქართველოს მხარეს იბრძოდნენ და რამდენიმე მათგანი ამ ომში გმირულად დაეცა. უნდა გვახსოვდეს ის უკრაინელი სპეციალისტები, რომელნიც აქტიურად ეხმარებოდნენ ქართულ სახელმწიფოს 2008 წლის რუსეთ-საქართველოს ომში, განსაკუთრებით ანტისაჰაერო თავდაცვის საშუალებათა მართვისას. მაგრამ მთავარი მაინც გეოპოლიტიკური ვითარებაა.

უნდა გვახსოვდეს, რომ თუკი პუტინმა ვერ მიაღწია საწადელს უკრაინაში, იგი მიიღებს მასიურ პროტესტებს უკვე თავად რუსეთის ტერიტორიაზე. ამ პროტესტების პირობებში გარდაუვალია შუა აზიის, ჩრდილო კავკასიისა და ვოლგისპირეთის აფეთქება. პარალელურად, ურალის ქედის აღმოსავლეთით მდებარე ბუნებრივი რესურსებით მდიდარი ტერიტორიები დაიწყებენ მოსკოვისგან დისტანცირებას, განსაკუთრებით ეს მოსალოდნელია თურქულენოვანი ტუვის, იაკუტიისა და ალთაის რესპუბლიკებში. ერთი სიტყვით, მოსალოდნელია 1917 წლის მსგავსი რადიკალური გეოპოლიტიკური გადანაცვლება, სადაც საქართველოს ექნება დაახლოებით 2 წლიანი ვადა, რომ აღიდგინოს ტერიტორიული მთლიანობა.

ამ მიზნის მისაღწევად, საქართველო მოუწევს 58-ე არმიის ნარჩენებთან (თუკი ამ დრომდე იარსება) და მცირე სეპარატისტულ ფორმირებებთან დაპირისპირება. უფრო შორს რომ აღარ წავიდეთ, შეუიარაღებელი თავლითაც ჩანს, თუ რა მნიშვნელობა აქვს უკრაინის საკითხს. და ისიც კარგად ჩანს, რომ ეს ომი სულაც არ არის „სხვისი“.

ერთი სიტყვით, ქართველთა უკრაინაში მიმდინარე ანტიტერორისტულ ოპერაციაში ჩართვა სასიცოცხლოა ჩვენი ქვეყნის ეროვნული ინტერესებისთვის. აუცილებელია დაიწყოს მოხალისეთა რეკრუტირება და მათი კომპეტენციის შესაბამის პოზიციებზე განთავსება. თუმცა, გარდა უშუალოდ კონფლიქტის მონაწილეებისა, მნიშვნელოვანია ის მხარდამჭერთა ბაზა, რომელმაც უნდა უზრუნველყოს ქართველი მებრძოლები მატერიალური, ინფორმაციული და მორალური მხარდაჭერით. უნდა გვახსოვდეს, რომ ომიდან დაბრუნებული ქართველები საქართველოდან რუსული ინტერესების გამოძევებაში საკვანძო როლს შეასრულებენ.

პ.ს. გულდასაწყვეტია, რომ თავდაცვისა და შინაგან საქმეთა სამინისტროს ნაცვლად უკრაინაში ქართველ მებრძოლთა მობილიზებას ახდენს პატიმრობაში მყოფი ბაჩო ახალაია.